Viral: దేవుడా! ఈ కార్పొరేట్ ఉద్యోగి దుస్థితి చూడండి.. నదిలో కూర్చుని..
ABN , Publish Date - Aug 19 , 2024 | 06:02 PM
సరదాగా టూర్‌కు వెళ్లిన ఓ కార్పొరేట్ ఉద్యోగి అక్కడ కూడా తీరిక లేకుండా విధుల్లో తలమునలకలైన ఉదంతం ప్రస్తుతం నెట్టింట సంచలనంగా మారింది. నదిలో కూర్చుని అతడు లాప్‌టాప్‌పై పని చేస్తున్న తీరు నెటిజన్లను విస్తుపోయేలా చేస్తోంది.
ఇంటర్నెట్ డెస్క్: కార్పొరేట్ కంపెనీల్లో ఉద్యోగాలు చేయాలనేది నేటి తరం కల. భారీ జీతాలు, మతిపోగొట్టే లైఫ్‌స్టైల్ వంటివి యువతను కార్పొరేట్ ప్రపంచంవైపు ఆకర్షితులయ్యేలా చేస్తున్నాయి. కార్పొరేట్‌లో జీతాలకు తగినట్టే పని ఒత్తిడి కూడా ఉంటుందనేది జగమెరిగిన సత్యం. కొందరు ఈ ఒత్తిడిని తట్టుకుని దూసుకెళుతుంటే మరికొందరు పని భారంతో కుంగిపోతున్నారు. ఇక వర్క్ ఫ్రం హోం వచ్చాక కొందరికి జీవితమే పనిగా మారిపోవడంతో మానసిక ఇబ్బందులు ఎదుర్కొంటున్నారు. నిరంతరం పనిలో మునిగితేలుతూ ఉద్యోగమే ప్రపంచంగా బతికేస్తున్నారు. అలాంటి ఓ వ్యక్తి వీడియో నెట్టింట వైరల్గా (Viral) మారింది.
Viral: ఎంతో ముచ్చటపడి ఎలక్ట్రిక్ బైక్ కొంటే.. ఎలాంటి గతి పట్టిందో చూడండి!
వీడియోలోని వ్యక్తి తన హడావుడి జీవితం నుంచి సేద తీరేందుకు టూర్ ప్లాన్ చేసినా అతడిని ఉద్యోగ బాధ్యతలు మాత్రం విడిచిపెట్టలేదు. నదీతీరంలో ప్రకృతి అందాల నడుమ సేద తీరాల్సిన అతడు చివరకు నదీలోనే వర్క్ మొదలెట్టేశాడు. వర్క్ ఫ్రం హోంకు కొనసాగింపు అన్నట్టుగా వర్క్ ఫ్రం రివర్ (నది)కు తెరతీశాడు. తీరంలో కూర్చున్న అతడు ఎదురుగా ఉన్న రాయిపై తన లాప్‌టాప్ తెరిచి పని ప్రారంభించాడు. మొబైల్‌లో వచ్చే మెసేజీలు చూసుకుంటూ పనిలో మునిగిపోయాడు. తాను టూర్‌పై వచ్చానన్న విషయమే మర్చిపోయినట్టుగా ఉద్యోగ బాధ్యతల్లో లీనమైపోయాడు (video of man working in river goes viral in social media).
అక్కడే ఉన్న మరో వ్యక్తి ఇదంతా రికార్డు చేసి నెట్టింట పంచుకోవడంతో ఈ ఉదంతం వైరల్గా మారింది. జనాలు షాకైపోయేలా చేస్తోంది. అనేక మంది సదరు కార్పొరేట్ ఉద్యోగిపై జాలి చూపించారు. కాస్తంత ప్రశాంతంగా సేద తీరే అవకాశం కూడా లేనప్పుడు ఎంత పెద్ద ఉద్యోగమైనా ఒకటే అని కామెంట్ చేశారు. కార్పొరేట్ ప్రపంచం అంటే ఇంతేనని కొందరు నిట్టూర్చారు. ఉద్యోగ జీవితం ఎంత బిజీగా ఉన్నా వ్యక్తిగత జీవితానికి సమ ప్రాధాన్యం ఇవ్వాలని, ఈ కళను నేటి తరం ఒడిసిపట్టాలని కొందరు అన్నారు. ఇలా రకరకాల కామెంట్స్ మధ్య వీడియో తెగ వైరల్ అవుతోంది. జనాలు ఆశ్చర్యపోయేలా చేస్తోంది.
