Rohit Sharma: టీ20ల్లో ఎంఎస్ ధోనీ రికార్డ్‌ని సమం చేసిన రోహిత్ శర్మ

భారత క్రికెట్ జట్టుకి కెప్టెన్సీ బాధ్యతలు వహించినప్పటి నుంచి రోహిత్ శర్మ తన పేరిట ఎన్నో రికార్డుల్ని లిఖించుకున్నాడు. బ్యాటర్‌గా, కెప్టెన్‌గా ఎన్నో ఘనతల్ని సాధించాడు. ఇప్పుడు తాజాగా టీ20ల్లో టీమిండియా మాజీ కెప్టెన్ ఎంఎస్ ధోనీకి చెందిన ఓ రికార్డ్‌ని అతడు సమం చేశాడు. టీ20 ఫార్మాట్‌లో అత్యంత విజయాలు సాధించిన కెప్టెన్‌గా ఇన్నాళ్లూ ధోనీ అగ్రస్థానంలో ఉండగా.. ఇప్పుడు రోహిత్ శర్మ అతని రికార్డ్‌ని సమం చేసి, తొలి స్థానాన్ని పంచుకుంటున్నాడు. అయితే.. సక్సెస్ రేషియో పరంగా చూసుకుంటే, రోహిత్‌దే అగ్రస్థానం.

టీ20 ఫార్మాట్‌లో మొత్తం 72 మ్యాచ్‌లకి సారథిగా వ్యవహరించిన ధోనీ.. తన కెప్టెన్సీలో భారత జట్టుకి 41 విజయాలు అందించాడు. కానీ.. రోహిత్ శర్మ మాత్రం కేవలం 53 మ్యాచ్‌ల్లోనే 41 విజయాలు సాధించిపెట్టాడు. ఆదివారం ఆఫ్ఘనిస్తాన్‌పై భారత్ సాధించిన విజయంతో.. రోహిత్ ఈ రికార్డ్‌ని తన ఖాతాలో వేసుకున్నాడు. విజయాల సంఖ్య పరంగా ఇద్దరూ సమానంగానే ఉన్నారు కానీ, రేషియో పరంగా మాత్రం ధోనిని రోహిత్ అధిగమించాడు. అంతేకాదు.. పొట్టి ఫార్మాట్‌లో 150 మ్యాచ్‌లు ఆడిన ఏకైక క్రికెటర్‌గా (పురుషుల్లో) చరిత్రపుటలకెక్కాడు. కాకపోతే.. ఆ మ్యాచ్‌లో అతడు డకౌట్‌గా వెనుదిరగడమే భారతీయ క్రీడాభిమానులను నిరాశకు గురి చేసింది.

ఇక ఈ మ్యాచ్ విషయానికొస్తే.. తొలుత టాస్ ఓడి బ్యాటింగ్ చేసిన ఆఫ్ఘనిస్తాన్ జట్టు నిర్ణీత 20 ఓవర్లలో 172 పరుగులు చేసి ఆలౌట్ అయ్యింది. అనంతరం బ్యాటింగ్‌కి దిగిన భారత్.. 15.4 ఓవర్లలోనే 173 పరుగులు చేసి గెలుపొందింది. యువ ఆటగాళ్లైన యశస్వీ జైస్వాల్ (68), శివమ్ దూబె (63) ఊచకోత కోయడంతో.. భారత్ ఈ ఘనవిజయాన్ని సొంతం చేసుకొంది. దీంతో.. మూడు మ్యాచ్‌ల ఈ టీ20 సిరీస్‌ని టీమిండియా 2-0 తేడాతో కైవసం చేసుకుంది.