నలుగురు మహిళలను ఢీకొట్టిన కారు

• ఇద్దరి మృతి.. ఒకరి పరిస్థితి విషమం.. పెద్దపల్లిలో ఘటన

• మానుకోట జిల్లాలో ప్రమాదం.. తల్లీ కుమారుడి మృతి

పెద్దపల్లిటౌన్‌/పెద్దవంగర, నవంబరు 12(ఆంధ్రజ్యోతి): రోడ్డు దాటుతున్న నలుగురు మహిళలను కారు ఢీకొట్టడంతో ఇద్దరు చనిపోయారు. ఒకరి పరిస్థితి విషమంగా ఉంది. పెద్దపల్లిలోని ఉదయ్‌నగర్‌కు చెందిన కుక్క భాగ్యలక్ష్మి, కుక్క అమృత, కుక్క పద్మ, కుక్క కాంతమ్మ సమీప బంధువులు. వీరంతా సోమవారం పట్టణంలోని ఓ ఫంక్షన్‌ హాల్‌లో పనికి వెళ్లారు. పని అయిపోయాక మంగళవారం తెల్లవారుజామున ఇంటికి వెళ్లేందుకు బయలుదేరారు. ఫంక్షన్‌ హాల్‌ వద్ద ఉన్న రాజీవ్‌ రహదారిని దాటుతుండగా కరీంనగర్‌ వైపు నుంచి వస్తున్న కారు మహిళలను ఢీకొట్టింది. దీంతో భాగ్యమ్మ(50), అమృత(49) అక్కడికక్కడే మృతిచెందారు. పద్మ పరిస్థితి విషమంగా ఉండటంతో కరీంనగర్‌ తరలించారు. మహబూబాబాద్‌ జిలా పెద్దవంగర మండలం అమర్‌సింగ్‌ తండాకు చెందిన జాటోతు శాంతమ్మ(63), వెంకన్న(48) మంగళవారం బంధువుల అంత్యక్రియలకు వెళ్లి బైక్‌పై తిరుగు ప్రయాణమయ్యారు. పెద్దవంగర మండలం వడ్డెకొత్తపల్లి శివారులో ఎదురుగా వస్తున్న కారు ఢీకొట్టింది. దీంతో తల్లీ కుమారుడు అక్కడిక్కడే మృతి చెందారు.