MLA Prakash Goud: కాంగ్రెస్‌ గూటిలో చేరిన బీఆర్ఎస్ ఎమ్మెల్యే ప్రకాశ్ గౌడ్

హైదరాబాద్: బీఆర్ఎస్ (BRS) నుంచి అధికార కాంగ్రెస్‌ పార్టీలోకి వలసల పర్వం కొనసాగుతోంది. తాజాగా రాజేంద్రనగర్ ఎమ్మెల్యే టీ.ప్రకాశ్ గౌడ్ కాంగ్రెస్ పార్టీ తీర్థం పుచ్చుకున్నారు. జూబ్లీహిల్స్‌లోని సీఎం రేవంత్ రెడ్డి నివాసంలో హస్తం పార్టీలో చేరారు. సీఎం రేవంత్ రెడ్డి కాంగ్రెస్ కండువా కప్పి సాదరంగా ఆహ్వానించారు. పుష్పగుచ్చాన్ని అందించారు. ఎమ్మెల్యేతో పాటు ఆయన అనుచరులు కూడా కాంగ్రెస్ పార్టీలో చేరారు.

కాగా ఈ కార్యక్రమంలో మంత్రి పొంగులేటి శ్రీనివాస రెడ్డితో పాటు పలువురు కాంగ్రెస్ నేతలు పాల్గొన్నారు. తాజా చేరికతో మొత్తం 8 మంది కాంగ్రెస్‌లో చేరినట్టయింది.

రేపు మరో ఎమ్మెల్యే

రేపు (శనివారం) మరో బీఆర్ఎస్ ఎమ్మెల్యే కాంగ్రెస్ పార్టీలో చేరడం ఖాయమైంది. శేరిలింగంపల్లి ఎమ్మెల్యే అరికపూడి గాంధీ సీఎం రేవంత్ రెడ్డి సమక్షంలో హస్తం పార్టీ గూటికి చేరనున్నారు. ఉదయం 10 గంటలకు జూబ్లిహిల్స్‌లోని సీఎం నివాసంలో కాంగ్రెస్ పార్టీ కండువా కప్పుకోనున్నారు. ఆయనతో పాటు పలువురు కార్పోరేటర్లు, నేతలు కూడా పార్టీ మారనున్నారు.

కాగా మరో ఆరుగురు బీఆర్ఎస్ ఎమ్మెల్యేలు కాంగ్రెస్‌లో చేరబోతున్నారంటూ ఖైరతాబాద్ ఎమ్మెల్యే దానం నాగేందర్ వ్యాఖ్యానించారు. త్వరలో బీఆర్‌ఎస్ఎల్పీ కాంగ్రెస్‌ పార్టీలో విలీనం కాబోతోందని అనడం తెలంగాణ రాజకీయాల్లో చర్చనీయాంశమైంది. సిటీలోని ఆదర్శ్‌నగర్ ఎమ్మెల్యే క్వార్టర్స్‌లో హిమాయత్ నగర్ డివిజన్‌కు సంబంధించిన కల్యాణ లక్ష్మీ , షాది ముబారక్ చెక్కులను ఎమ్మెల్యే పంపిణీ చేశారు. ఈ సందర్భంగా ఆయన మీడియాతో మాట్లాడుతూ ఈ సంచలన వ్యాఖ్యలు చేసిన విషయం తెలిసిందే.

For more Telangana News and Telugu News