Hyderabad: ఎప్‌సెట్‌ కౌన్సెలింగ్‌ తేదీల మార్పు!

• 27న నిర్వహించాల్సి ఉండగా వచ్చే నెల 4కు వాయిదా

• మూడు దశల్లో కౌన్సెలింగ్‌.. ఆగస్టు దాకా నిర్వహణ

హైదరాబాద్‌, జూన్‌ 25 (ఆంధ్రజ్యోతి): ఇంజనీరింగ్‌ సీట్ల భర్తీకి సంబంధించిన ఎప్‌సెట్‌ కౌన్సెలింగ్‌ తేదీలు మారాయి. ఈ మేరకు తాజాగా అధికారులు కొత్త షెడ్యూల్‌ను ప్రకటించారు. ఇదివరకటి షెడ్యూల్‌ ప్రకారం ఈ కౌన్సెలింగ్‌ ప్రక్రియ ఈ నెల 27న ప్రారంభం కావాల్సి ఉంది. తాజాగా దీన్ని వచ్చే నెల 4వ తేదీకి వాయిదా వేశారు. మొత్తం మూడు దశలో ఈ కౌన్సెలింగ్‌ను నిర్వహించనున్నారు. అప్పటికీ ఇంకా సీట్లు మిగిలితే.. స్పాట్‌ అడ్మిషన్లను చేపట్టనున్నారు. ఈ మొత్తం ప్రక్రియ ఆగస్టు వరకు కొనసాగనుంది.

కొత్త షెడ్యూల్‌ ప్రకారం జూలై 4 నుంచి 12వ తేదీల మధ్య అభ్యర్థులు ఆన్‌లైన్‌ స్లాట్‌ను నమోదు చేసుకుని, ఫీజును చెల్లించాల్సి ఉంటుంది. తర్వాత జూలై 6 నుంచి 13వ తేదీల మధ్య సర్టిఫికెట్ల వెరిఫికేషన్‌, 8 నుంచి 15వ తేదీ వరకు ఆప్షన్ల నమోదు, 19 తేదీన సీట్లను కేటాయించనున్నారు. సీట్లు పొందిన అభ్యర్థులు 19 నుంచి 23వ తేదీల మధ్య సెల్ఫ్‌ రిపోర్టింగ్‌ను చేయాలి. జూలై 26 నుంచి రెండవ దశ కౌన్సెలింగ్‌ను, ఆగస్టు 8వ తేదీ నుంచి చివరి దశ కౌన్సెలింగ్‌ను చేపట్టనున్నారు. ఆగస్టు 21 నుంచి 28 వరకు ఇంటర్నల్‌ స్లైడింగ్‌ ప్రక్రియ నిర్వహిస్తారు. అప్పటికీ ఇంకా సీట్లు మిగిలితే ఆగస్టు 28వ తేదీన స్పాట్‌ అడ్మిషన్లను చేపట్టనున్నారు.