Medaram: భూకంపం.. ఇంతకీ మేడారంలో ఏం జరుగుతుంది?

2018లో మేడారంలో సమ్మక్క సారలమ్మ జాతర సందర్భంగా చిలకలగుట్ట మీద గాలులు బీభత్సం సృష్టించాయి. 2024, ఆగస్టు 31వ తేదీన మళ్లీ అదే మేడారం అటవీ ప్రాంతంలో భారీ ఎత్తున గాలులు హోరెత్తి పోయాయి. లక్షలాది చెట్లు కూలిపోయాయి. కూకటివేళ్లతో ఎవరో పెకిలించినట్లు కనిపించాయి. 2024 డిసెంబర్ 04 అదే మేడారం అటవీ ప్రాంతంలో భూమి ప్రకంపించింది. వరుస సంఘటలు ఏళ్ల తర్వాత గాలులు వీస్తే.. గాలులు వీచిన కొన్ని మాసాలకే భూకంప ప్రకంపనలు ఇంతకీ అసలేం జరిగింది..? మేడారంపై ప్రకృతి పగబట్టిందా?.. సమ్మక్క సారలమ్మ జాతర సమీపిస్తున్న వేళ.. జనం తీవ్ర ఆందోళన చెందుతున్నారు. అమెరికా, అర్జెంటీనాలాంటి దేశాల్లో వచ్చే టోర్నడోలు ... మేడారం అటవీ ప్రాంతానికి తరలి వచ్చేసినట్లుగా ఉన్నాయి. సాయంత్రం కాగానే అడవుల్లో ఏం జరుగుతోందో ఎవరికీ ఏం తెలియడం లేదు. అంతా గందరగోళ పరిస్థితి నెలకొంది.

మూడు కిలోమీటర్ల మేర వలయాకారంలో ఒకేసారి వృక్షాలు కుప్పకూలిపోయాయి. ఈ ఏడాది ఆగస్టు 31వ తేదీ సాయంత్రం 6 నుంచి 7 గంటల మధ్య మేడారం ప్రాంతంలో 15 కి.మీ వ్యవధిలో దాదాపు 200 హెక్టార్లలో గాలులు పెను బీభత్సం సృష్టించింది. ఇప్పుడిదే ప్రాంతంలో భూకంప కేంద్రం ఉంది. ఇక్కడ సమ్మక్క సారలమ్మ గద్దె ఉంది. అప్పటి టోర్నడోలు... ఇప్పుడు భకంపం ఒకేచోట ఎందుకుంది. ఈ రెండింటికీ ఏమైనా లింక్‌ ఉందా? అనే దిశగా అధికారులు పరిశీలిస్తున్నారు. స్థానికుల్లో చర్చ సైతం మొదలైంది... వనదేవతలు ఆగ్రహించారా? అనే దిశగా ఓ చర్చ అయితే జరుగుతోంది.

అయితే వాతావరణంలో చోటు చేసుకున్న మార్పులకు, భూ ప్రకంపనలకు సంబంధం లేదని శాస్త్రవేత్తలు స్పష్టం చేస్తున్నాు. ఇది యాదృశ్చికమేనంటూ వారు కొట్టి పారేశారు. భూమికి 40 కి.మీ లోతులో భూకంప కేంద్రం ఉండటం వల్ల ప్రకంపనల తీవ్రత , నష్టం తగ్గిందని... అదే ఏ పది కిలోమీటర్ల లోతులో భూకంప కేంద్రం ఉంటే పరిస్థితి దారుణంగా ఉండేదంటున్నారు నిపుణులు హెచ్చరిస్తున్నారు.

ఇక ఈ విపరీత పరిణామాలకు కారణం.. మానవ తప్పిదాలు.. ప్రకృతి విధ్వంసమేనా... అసలు 50 ఏళ్ల తర్వాత అలాంటి భూకంపం మళ్లీ రావడమేంటి? టోర్నడోలు విధ్వంసం సృష్టించడమేంటి? ఆగస్ట్‌ 31వ తేదీన గంటకు 120 కిలోమీటర్లకుపైగా వేగంతో... సుడిగాలులు మేడారం అడవుల్లో వచ్చాయి. ఆ గాలులే జనావాసాల్లో వచ్చుంటే... వేలాది ఇళ్లుపైకి లేచేవి. ఆస్తి, ప్రాణ నష్టం భారీగా ఉండేది. భూకంప కేంద్రం సైతం అడవుల్లో ఉండటం వల్ల .. నష్టం జరగలేదు.

మేడారం అడవుల్లో టోర్నడోలపై నేషనల్‌ రిమోట్‌ సెన్సింగ్‌ సెంటర్‌ (NRSC) అధికారుల బృందం విచారణ చేపట్టింది. 2018 జనవరి 22న కూడా మేడారం చిలకల గుట్టలో ఇలాంటి టోర్నడోనే వచ్చింది. క్యుములో నింబస్‌ మేఘాలు, ధూళి కణాల నుంచి టోర్నడోలు పుట్టుకొస్తాయి. వెచ్చని, తేమతో కూడిన గాలి చల్లని, పొడి గాలిని ఢీకొన్నప్పుడు సుడులు తిరుగుతాయి.

కనీసం గంటకు 105 నుంచి 322 కిలోమీటర్ల వేగంతో సుడులు తిరుగుతూ గాలులు వీస్తాయి. ఇవి వచ్చిన చోట... పెద్ద పెద్ద బిల్డింగులను సైతం పైకిలేచిపోతాయి. అమెరికాలో ఇలాంటి టోర్నడోలు అధికంగా వస్తాయి. కానీ మారిన వాతావరణ పరిస్థితుల నేపథ్యంలో ఇటీవలి కాలంలో ఇక్కడ సైతం బీభత్సం సృష్టిస్తున్నాయి. ఇటీవలే నల్లగొండలోనూ ఇలాంటి టోర్నడో కనిపించింది.

మామూలుగా అయితే ఇండియాలో వాతావరణం వేడిగా, ఉక్కపోతతో ఉంటుంది. ఇలాంటి వాతావరణం ... టోర్నడోలకు అనుకూలం కాదు. కానీ వాతావరణంలో అస్థిరత ఎక్కువైతే ఏమైనా జరగొచ్చు. అమెరికాలో విశాలమైన ప్రాంతాలు ఎక్కువ. ఈ నేపథ్యంలో టోర్నడో వచ్చినా నష్టం తక్కువే... వాటికి తగ్గట్లే అక్కడ ఇళ్లు నిర్మిస్తారు. కానీ అదే టోర్నడో భారత్‌లో వస్తే మాత్రం ఇళ్లు, వాహనాలు, జంతువుల్ని కూడా గాల్లోకి లేపేస్తుంది. ఆస్తి, ప్రాణ నష్టం కూడా అధికంగానే ఉంటుంది.

For Telagnana News And Telugu News