Gandhi statue: మన్నించు మహాత్మా..!!
ABN , Publish Date - Nov 04 , 2024 | 05:02 AM
మద్యం మత్తు, సోషల్‌ మీడియా పైత్యంతో కొందరు విచక్షణ మరిచి ప్రవర్తిస్తున్నారు. ఇదే క్రమంలో కొందరు ఆకతాయిలు మహాత్మా గాంధీ విగ్రహం నోటిలో బాంబు పెట్టి పేల్చి వీరంగం సృష్టించారు.
గాంధీ విగ్రహం నోటిలో బాంబు పేల్చిన ఆకతాయిలు
హైదరాబాద్‌లో నలుగురి అరెస్టు
బోయిన్‌పల్లి, నవంబరు 3(ఆంధ్రజ్యోతి): మద్యం మత్తు, సోషల్‌ మీడియా పైత్యంతో కొందరు విచక్షణ మరిచి ప్రవర్తిస్తున్నారు. ఇదే క్రమంలో కొందరు ఆకతాయిలు మహాత్మా గాంధీ విగ్రహం నోటిలో బాంబు పెట్టి పేల్చి వీరంగం సృష్టించారు. ఇందుకు సంబంధించిన వీడియో వైరల్‌ కాగా, హైదరాబాద్‌లోని బోయిన్‌పల్లి కి చెందిన నలుగురు ఆకతాయిలను పోలీసులు అరెస్టు చేశారు. బోయిన్‌పల్లి బాపూజీనగర్‌లో నివాసముండే ఓ యువకుడు(17) తన ముగ్గురు స్నేహితుల(16 ఏళ్ల వయస్సు)తో కలిసి తన బంధువులకు సంబంధించిన పెద్దకర్మ కార్యక్రమంలో పాల్గొన్నాడు.
అక్కడ మద్యం సేవించిన వారంతా ఆ ప్రాంతంలోని గాంధీ విగ్రహం వద్దకు చేరుకున్నారు. ఓ యువకుడు గాంధీ విగ్రహం నోటిలో బాంబు పెట్టి వెలిగించాడు. బాంబు పేలిన వెంటనే వారంతా వెకిలిగా నవ్వారు. ఈ వీడియోను వారు స్నాప్‌చాట్‌లో పోస్ట్‌ చేయగా... ఆ వీడియోను చూసిన స్థానికులు పోలీసులకు ఫిర్యాదు చేశారు. దీంతో విచారణ చేపట్టిన పోలీసులు ఆ నలుగురు ఆకతాయిలను అరెస్టు చేశారు.
