Heart attack: పురుషులకు గుండెపోటు రావడానికి ప్రధాన కారణాలు ఇవే!
ABN , Publish Date - Jan 04 , 2025 | 05:38 PM
గుండెపోటు కేసులు రోజురోజుకు పెరుగుతున్నాయి. నేటి కాలంలో గుండె ఆరోగ్యాన్ని కాపాడుకోవడం చాలా అవసరం. అయితే, పురుషులకు గుండెపోటు రావడానికి ప్రధాన కారణాలు ఏంటో ఈ కథనంలో తెలుసుకుందాం..
Heart attack: ఈ రోజుల్లో గుండెపోటు సర్వసాధారణం. చాలా మందికి ఛాతీ నొప్పి వచ్చిన వెంటనే గుండెపోటు వస్తుంది. ఇది ఎవరికైనా, ఎక్కడైనా, ఎప్పుడైనా రావొచ్చు. గతంలో వృద్ధులకు గుండెపోటు ఎక్కువగా వచ్చేది. కానీ, ఈ రోజుల్లో గుండెపోటు యువతను కూడా వదలడం లేదు. యువకుల నుంచి వృద్ధుల వరకు చాలా మంది గుండెపోటుకు గురయ్యారు. ముఖ్యంగా పురుషుల్లో గుండెపోటు వచ్చే అవకాశం ఎక్కువగా ఉంటుంది. దీనికి చాలా ప్రధాన కారణాలు ఉన్నాయి. జీవనశైలి, ఆహారం, శారీరక శ్రమ, మానసిక ఒత్తిడి, జన్యుపరమైన సమస్యలు అందులో ముఖ్యమైనవి.
సరైన ఆహారం తీసుకోకపోవడం..
చాలా మంది పురుషులు గంటల తరబడి ఆఫీసులో పని చేస్తుంటారు. ఆరోగ్యకరమైన కూరగాయలు, పండ్లు వంటివి తీసుకోకుండా జంక్ ఫుడ్‌ను తీసుకుంటారు. వీటిని తీసుకోవడం వల్ల శరీరంలో కొలెస్ట్రాల్ పెరుగుతుంది. దీని వల్ల గుండెకు తగినంత రక్త ప్రసరణ జరగదు. గుండెకు ఆక్సిజన్ సరఫరా కుడా తగ్గుతుంది. ఇది గుండెపోటుకు దారి తీస్తుంది.
మానసిక ఒత్తిడి..
గుండెపోటుకు మరో ప్రధాన కారణం మానసిక ఒత్తిడి. పురుషులు కష్టపడి పని చేస్తారు. ఒత్తిడి మధ్యలో భవిష్యత్తు గురించి ఎప్పుడూ ఆందోళన చెందుతారు. ఈ ఒత్తిడి గుండెను బాగా ప్రభావితం చేస్తుంది. ఇది గుండెపోటుకు దారి తీస్తుంది. అటువంటి సమయాల్లో దుఖం, ప్రతికూల భావోద్వేగాలు హృదయ స్పందన రేటును పెంచుతాయి.
శారీరక శ్రమ..
శారీరక శ్రమ లేకపోవడం కూడా గుండెపోటుకు ప్రధాన కారణం. చాలా మంది పురుషులు ఎక్కువసేపు ఆఫీసుల్లో కూర్చుని పని చేస్తుంటారు. ఇలా కుర్చీపై ఎక్కువసేపు కూర్చోవడం వల్ల శరీరానికి ఎలాంటి వ్యాయామం అందదు. శారీరక వ్యాయామం లేకపోవడం వల్ల శరీరంలో కొవ్వు పేరుకుపోతుంది. అయితే, ఇది గుండెకు ప్రమాదకరం.
వంశపారంపర్యం..
పురుషులలో వంశపారంపర్యంగా వచ్చే గుండె సంబంధిత రుగ్మతలు ప్రధాన కారణం. పెద్దలకు గుండె జబ్బులు, మధుమేహం లేదా అధిక రక్తపోటు వంటి ఆరోగ్య సమస్యలు ఉంటే, ఆ సమస్యలు వారసత్వంగా వస్తాయి. గుండెపోటుకు గురైన తాతలు లేదా ఇతర కుటుంబ సభ్యుల మాదిరిగానే మీరు కూడా అదే ప్రమాదంలో ఉండవచ్చని దీని అర్థం.
అధిక బరువు..
ఇవే కాకుండా ధూమపానం, మద్యపానం, అధిక బరువు కూడా గుండెపోటుకు ప్రధాన కారణాలు. ధూమపానం గుండెకు అనుసంధానించబడిన రక్త నాళాలను తగ్గిస్తుంది. అధిక బరువు గుండెపోటు ప్రమాదాన్ని పెంచుతుంది.
మొత్తం మీద పురుషులలో గుండెపోటుకు కారణాలు జీవనశైలి, వారి ఆహారం, మానసిక ఒత్తిడి, జన్యుపరమైన కారణాలపై ఆధారపడి ఉంటుంది. మన రోజువారీ జీవనశైలిపై దృష్టి పెట్టడం ద్వారా గుండె ఆరోగ్యాన్ని మెరుగుపరచుకోవచ్చు.
(Note: ఈ కథనం ఇంటర్నెట్ ఆధారంగా ఇవ్వబడింది. ABN న్యూస్ దీనిని ధృవీకరించలేదు.)
