Buchi Ram Prasad: వైసీపీ అవినీతి ఉండవల్లికి ఎందుకు కనిపించడం లేదు? ఆ ధైర్యం ఉండవల్లికి ఉందా?

అమరావతి: మాజీ ఎంపీ ఉండవల్లి అరుణ్ కుమార్‌పై (Undavalli Arun Kumar) టీడీపీ (TDP) రాష్ట్ర కార్యనిర్వాహక కార్యదర్శి బుచ్చిరామ్ ప్రసాద్ (Buchi Ram Prasad) ఆగ్రహం వ్యక్తం చేశారు. సీఐడీకి అండగా నిలవాలి.. రాష్ట్ర ప్రభుత్వ పరువు ప్రతిష్టలు కాపాడాలనే ఉండవల్లి స్కిల్ డెవలప్‌మెంట్ వ్యవహారంపై హైకోర్టులో పిల్ వేశాడని మండిపడ్డారు.

"స్కిల్ డెవలప్ మెంట్ కేసులో ఎలాంటి ఆధారాలు, సాక్ష్యాలు లేకుండానే చంద్రబాబుని అక్రమంగా జైలుకు పంపిన విషయం ఉండవల్లికి తెలియదా?. ఉండవల్లి నిజంగా ప్రజల ఆస్తులకు కాపలా కుక్కే అయితే వాటిని దోచుకుంటున్న దొంగల్ని వదిలేసి, ఆవుల్ని చూసి అరవడం ఏమిటి?. నాలుగున్నరేళ్లుగా రాష్ట్రంలో జరుగుతున్న అరాచకాలు.. వైసీపీ ప్రభుత్వ అవినీతి ఉండవల్లికి ఎందుకు కనిపించడం లేదు?. ఉండవల్లి నిజంగా విజిల్ బ్లోయర్ అయితే, వైసీపీ ప్రభుత్వ మద్యం, ఇసుక కుంభకోణాలపై ఎందుకు న్యాయస్థానాలకు వెళ్లడు?. జగన్ సర్కార్ దోపిడీకి సంబంధించిన ఆధారాలు ఇవ్వడానికి టీడీపీ సిద్ధం.. వాటితో కోర్టుల్లో ప్రజాప్రయోజన వ్యాజ్యాలు వేసే ధైర్యం ఉండవల్లికి ఉందా?. అనేక చిట్ ఫండ్ కంపెనీల అక్రమాలుంటే, కేవలం మార్గదర్శిపైనే ఉండవల్లి న్యాయస్థానాలకు వెళ్లడం తన వ్యక్తిగత కక్షలో భాగం కాదా?." అని బుచ్చిరామ్ ప్రసాద్ ప్రశ్నించారు.