TTD Chairman: టీటీడీ చైర్మన్‌గా భూమన కరుణాకర్ రెడ్డి

తిరుమల: తిరుమల తిరుపతి దేవస్థానం(టీటీడీ) చైర్మన్‌గా (TTD Chairman) భూమన కరుణాకర్‌ రెడ్డి (Bhumana Karunakar Reddy) నియమితులయ్యారు. ఈ మేరకుఏపీ ప్రభుత్వం (AP Govt) నిర్ణయం తీసుకున్నట్టు తెలుస్తోంది. కాగా గతంలోనూ కరుణాకర్‌రెడ్డి టీటీడీ ఛైర్మన్‌గా పనిచేశారు. 2006-2008 మధ్య టీటీడీ చైర్మన్‌గా బాధ్యతలు నిర్వహించారు. ప్రస్తుతం భూమన తిరుపతి ఎమ్మెల్యేగా ఉన్నారు. కొద్ది రోజుల క్రితం సీఎం జగన్‌‌మోహన్‌ రెడ్డిని (CM YS Jaganmohan Reddy) కలిసిన భూమన తనకు టీటీడీ ఛైర్మన్‌ పదవి ఇవ్వాల్సిందిగా గట్టిగా కోరినట్లు తెలిసింది. చివరకు ఆయన కోరిక మేరకు టీటీడీ చైర్మన్‌ పదవి వరించింది. ఈనెల 16తో ప్రస్తుత పాలకమండలి పదవి కాలం ముగియనుంది. ఈ క్రమంలో ప్రస్తుతం టీటీడీ చైర్మన్‌గా ఉన్న వైవీ సుబ్బారెడ్డి (YV subbareddy) అనంతరం నూతన టీటీడీ చైర్మన్‌గా భూమనకరుణాకర్ రెడ్డిని నియమిస్తూ ప్రభుత్వం ఆదేశాలు జారీ చేసింది.

వైసీపీ ప్రభుత్వం ఏర్పడ్డాక వైవీ సుబ్బారెడ్డి రెండు సార్లు టీటీడీ చైర్మన్‌గా బాధ్యతలు నిర్వహించిన విషయం తెలిసిందే. 2019 జూన్ 22న వైవీ సుబ్బారెడ్డిని టీటీడీ చైర్మన్‌గా తొలిసారి ప్రభుత్వం నియమించింది. తిరిగి 2021 జూన్ 22న వైవీ సుబ్బారెడ్డి టీటీడీ చైర్మన్‌గా పదవీ కాలం ముగియడంతో తిరిగి ఆయనకే రెండోసారి టీటీడీ చైర్మన్‌ బాధ్యతలను అప్పగిస్తూ సర్కార్ నిర్ణయం తీసుకుంది. 2021 ఆగష్టు 8న వైవీ సుబ్బారెడ్డి రెండవసారి టీటీడీ చైర్మన్‌గా నియమితులయ్యారు. దీంతో రెండు దఫాలుగా వైవీ సుబ్బారెడ్డి టీటీడీ చైర్మన్‌గా బాధ్యతలు నిర్వహించారు. ఇప్పుడు తాజాగా మరో రెండు రోజుల్లో టీటీడీ పాలకమండలి పదవీకాలం ముగియనున్న నేపథ్యంలో టీటీడీ తదుపరి చైర్మన్‌ ఎవరు దానిపై ఆసక్తికర చర్చ జరిగింది. చాలా పేర్లు తెరపైకి వచ్చాయి. చివరకు తిరుపతి ఎమ్మెల్యే భూమన కరుణాకర్‌రెడ్డికే ఆ బాధ్యతలు అప్పగించాలని ప్రభుత్వం నిర్ణయించడం గమనార్హం.