Tirumala : శేషాచలం అటవీ ప్రాంతంలో 25 నుంచి 30 చిరుతలు ఉన్నాయట..

తిరుమల : శేషాచలం అటవీ ప్రాంతంలో ఒకటి కాదు.. రెండు కాదు.. ఏకంగా 25 నుంచి 30 చిరుతలు ఉన్నాయట. ఇది చెప్పింది మరెవరో కాదు డీఎఫ్ఓ శ్రీనివాసులు. కాగా.. నేటి తెల్లవారుజామున పట్టుబడిన చిరుతకు సంబంధించిన వివరాలను ఆయన వెల్లడించారు. పట్టుబడింది ఆడ చిరుత అని డీఎఫ్ఓ పేర్కొన్నారు. చిరుత వయస్సు మూడేళ్లు ఉంటుందన్నారు. ఘటన జరిగిన ప్రాంతంలో నమూనాలు సేకరించామన్నారు.

బాలిక పై దాడి చేసిన చిరుత.. పట్టుబడ్డ చిరుత ఒక్కటేనా అన్నదానిపై పరీక్షలు జరిపి నిర్ధారిస్తామన్నారు. పరీక్షల అనంతరం చిరుతను ఎక్కడికి తరలించాలో అటవీ శాఖ నిర్ణయం తీసుకుంటుందని డీఎఫ్ఓ శ్రీనివాసులు తెలిపారు. శేషాచలం అటవీ ప్రాంతంలో 25 నుంచి 30 చిరుతలు ఉన్నాయన్నారు. కాలిబాట అటవీ మార్గంలో ఎన్ని చిరుతలు సంచరిస్తున్నాయో త్వరలోనే అధ్యాయనం చేస్తామన్నారు. నడక మార్గానికి సమీపంలోని కిలో మీటర్ పరిధిలో 500 కెమెరాలు ఏర్పాటు చేసి ఎన్ని చిరుతలు సంచారిస్తున్నాయో గుర్తిస్తామన్నారు. 7వ మైల్ వద్ద అటవీ శాఖ ఆధ్వర్యంలో త్వరలోనే మానిటరింగ్ సెల్‌ని ఏర్పాటు చేస్తున్నామని డీఎఫ్వో శ్రీనివాసులు తెలిపారు.