Nara Lokesh: వ్యూహానికి ప్రతి వ్యూహం ఉంటుంది కదా..?: నారా లోకేష్

అమరావతి: ఆర్జీవీ దర్శకత్వంలో రూపొందిన ‘వ్యూహం’ సినిమాపై టీడీపీ జాతీయ ప్రధాన కార్యదర్శి నారా లోకేష్ స్పందించారు. ఈ సందర్భంగా శుక్రవారం అమరావతిలో మీడియాతో మాట్లాడుతూ వ్యూహానికి ప్రతి వ్యూహం ఉంటుంది కదా..? అని అన్నారు. ఎన్నికల ముందు ఈ తరహా సినిమాలు తీయడం ఓ ఫ్యాషన్ అయిందని.. ఇలాంటి సినిమాలకు సీఎం జగనే డబ్బులు పంచుతున్నారని విమర్శించారు. ఆర్జీవీ తరపున కోర్టుల్లో వాదనలు వినిపిస్తున్నది వైసీపీ ఎంపీ నిరంజన్ రెడ్డని, ఆ అడ్వకేట్లను చూస్తేనే ఆ సినిమా ఎలా ఉంటుందో అర్ధం చేసుకోవచ్చన్నారు. న్యాయపరంగా తమకున్న హక్కుల కోసం పోరాడుతున్నామని, నిజంగా సినిమా తీయాలంటే హు కిల్డ్ బాబాయ్, కోడి కత్తి, ప్యాలెస్సులో జరుగుతున్న అవినీతి మీద తీయొచ్చుకదా అని నారా లోకేష్ అన్నారు.

కాగా రామ్ గోపాల్ వర్మ తెరకెక్కించిన వ్యూహం చిత్రంపై హైకోర్టులో విచారణ జరుగుతోంది. ఈ చిత్రం ఇవాళ (శుక్రవారం) విడుదల కావాల్సి ఉంది. కానీ ఈ సినిమా విడుదల నిలిచిపోయింది. దీనిపై గురువారం విచారణ జరిపిన న్యాయస్థానం వ్యూహం సినిమా జనవరి 11వ తేదీ వరకు విడుదల చేయవద్దంటూ ఆదేశాల్చింది.