Rave party: బర్త్‌ డే పేరుతో రేవ్ పార్టీ.. పట్టుబడ్డ కేజీ గంజాయి.. ఎస్పీ ప్రత్యేక దృష్టి

ఎన్టీఆర్: జిల్లాలోని కొండపల్లి శాంతినగర్‌లో రేవ్ పార్టీ (Rave Party) కలకలం రేగింది. బర్త్ డే పేరుతో యువకులు రేవ్‌ పార్టీ నిర్వహించారు. సమాచారం అందుకున్న పోలీసులు రేవ్ పార్టీపై దాడి చేశారు. పది మంది యువకులు, ముగ్గురు యువతులను అదుపులోకి తీసుకున్నారు. వారి వద్ద నుంచి కేజీ గంజాయి (Cannabis)ని స్వాధీనం చేసుకున్నారు. రేవ్ పార్టీ చేసుకున్న విద్యార్థులంతా ఇంటర్‌మీడియట్ చదువుతున్నట్లు తెలుస్తోంది. విద్యార్థుల స్నేహితులను అదుపులోకి తీసుకుని విచారిస్తున్నారు.

కాగా... శాంతినగర్‌లో కొంతమంది విద్యార్థులు రేవ్‌ పార్టీ నిర్వహిస్తున్నట్లు పోలీసులకు సమాచారం అందింది. వెంటనే పోలీసులు అక్కడకు చేరుకోగా అప్పటికే కొంతమంది పారిపోయినట్లు పోలీసులు తెలిపారు. దాదాపు పది మంది యువకులను అదుపులోకి తీసుకున్న పోలీసులు.. రేవ్ పార్టీపై అన్ని కోణాల్లో విచారణ చేపట్టారు. యువకుల ఫోన్లను స్వాధీనం చేసుకున్న పోలీసులు.. అందులోని కాల్ డేటా ఆధారంగా వారి వారి పాత్రపై ఆరా తీస్తున్నారు. ఎంత మంది యువతీ, యువకులు ఈ రేవ్ పార్టీలో పాల్గొన్నారు.. ఎలాంటి అసాంఘిక కార్యకలాపాలకు పాల్పడ్డారనే విషయంపై పోలీసులు పూర్తి స్థాయిలో దర్యాప్తు చేపట్టారు. పట్టుబడిన ముగ్గురు యువతులతో పాటు మరికొందరు పార్టీకి వచ్చినట్లు పోలీసుల ప్రాథమిక విచారణలో బయటపడింది. వారి వివరాలను సేకరించి అదుపులోకి తీసుకునేందుకు ప్రత్యేక బృందాలను పంపినట్లు పోలీసులు తెలిపారు. అయితే రేవ్‌ పార్టీలో గంజాయిని స్వాధీనం చేసుకోవడం సంచలనంగా మారింది. వీరి వద్ద కేజీ గంజాయి ఎలా వచ్చింది?.. ఎక్కడి నుంచి కొనుగోలు చేశారు?.. అనే కోణంలో పోలీసులు విచారణ చేపట్టారు. ఈ వ్యవహారంపై జిల్లా ఎస్పీ ప్రత్యేకంగా దృష్టి సారించినట్లు తెలుస్తోంది. అన్ని కోణాల్లో దర్యాప్తు చేపట్టి త్వరలోనే పూర్తి విషయాలను బయటపెట్టనున్నట్లు పోలీసులు చెబుతున్నారు.