AP News: విజయవాడలో ఇసుక కాంట్రాక్టర్ల ఆందోళన

విజయవాడ: పెండింగ్ బిల్లులు (Pending Bills) చెల్లించాలని డిమాండ్ చేస్తూ మంగళవారం విజయవాడలో ఇసుక కాంట్రాక్టర్లు (Sand Contractors) ఆందోళనకు దిగారు. తాడిగడపలోని రాష్ట్ర ఖనిజాభివృద్ధి సంస్థ కార్యాలయం ఎదుట ధర్నా (Protest) చేశారు. రోడ్డుపై బైఠాయించి ప్రభుత్వానికి వ్యతిరేకంగా నినాదాలు చేశారు. గత రెండేళ్లుగా తమకు బిల్లులు ఇవ్వడంలేదని ఇసుక కాంట్రాక్టర్లు ఆవేదన వ్యక్తం చేశారు. మార్చి నెల 25లోపు బిల్లులు ఇస్తామని అధికారులు హామీ ఇచ్చారని.. అయితే బిల్లులు ఇవ్వకుండా తిప్పుతున్నారని కాంట్రాక్టర్లు ఆగ్రహం వ్యక్తం చేశారు.

పెండింగ్ బిల్లులు అడుగుతుంటే తమను కార్యాలయంలోకి కూడా రానివ్వడంలేదని కాంట్రాక్టర్లు వాపోయారు. అప్పులు చేసి ఇసుక రవాణా చేస్తే ప్రభుత్వం తమను పట్టించుకోకపోవడం అన్యాయమన్నారు. ఆర్థిక బాధలతో మానసికంగా కుంగిపోతున్నామని ఇప్పటికైనా ప్రభుత్వం స్పందించి తమకు బిల్లులు మంజూరు చేయాలని కోరారు. ప్రభుత్వం బిల్లులు చెల్లించకపోతే తమకు ఆత్మహత్యేలే శరణ్యమని కాంట్రాక్టర్లు కంటతడిపెట్టారు.