Krishna Dist.: టీడీపీ నేత కొల్లు రవీంధ్ర హౌస్ అరెస్టు..

కృష్ణా జిల్లా: మచిలీపట్నంలో టీడీపీ నేత, మాజీ మంత్రి కొల్లు రవీంద్ర (Kollu Ravindra)ను పోలీసులు హౌస్ అరెస్టు (Hourse Arrest) చేశారు. మూడు రోజుల క్రితం ఇంగ్లీష్‌పాలెంలో టీడీపీ కార్యకర్తలపై కొందరు దాడి చేశారు. నిందితులను అరెస్టు చేయాలని చిలకలపూడి పోలీస్ స్టేషన్ ఎదుట కొల్లు రవీంధ్ర ఆందోళనకు సిద్ధమయ్యారు. అయితే విషయం తెలుసుకున్న పోలీసులు ఆయనను ఇంటి నుంచి బయటకు రాకుండా హౌస్ అరెస్టు చేశారు. దీంతో పరిస్థితి ఉద్రిక్తతగా మారింది. మరోవైపు టీడీపీ కార్యకర్తలపై దాడి చేసిన వైసీపీ (YCP) కార్యకర్తలను తక్షణమే అరెస్టు చేయాలని కొల్లు రవీంధ్ర డిమాండ్ చేశారు.

ఈ సందర్భంగా కొల్లు రవీంధ్ర మీడియాతో మాట్లాడుతూ టీడీపీ కార్యకర్తలపై దాడి చేసిన వైసీపీ కార్యకర్తలను తక్షణం అరెస్ట్ చేయాలని, లేని పక్షంలో రేపటి నుంచి (శుక్రవారం) ఆమరణ దీక్ష చేస్తానని ప్రకటించారు. గత మూడు రోజుల క్రితం మచిలీపట్నం ఇంగ్లీష్ పాలెంలో టీడీపీ మైనార్టీ కార్యకర్తలపై వైసీపీ రౌడీమూకలు దాడి చేశాయన్నారు. దాడిలో గాయపడ్డ మైనార్టీ కార్యకర్తలు సయ్యద్ బాజీ, చోటా బాబు చావు బ్రతుకుల్లో కొట్టుమిట్టాడుతున్నారన్నారు. పోలీసులు వైసీపీ నేతలకు తొత్తుగా వ్యవహరిస్తున్నారని ద్వజమెత్తారు. ఎమ్మెల్యే పేర్నినాని నిందితులను కాపాడుతున్నారని కొల్లు రవీంద్ర ఆరోపించారు.