AP News: టీడీపీ నేతకు చెందిన చీనీ చెట్ల నరికివేత.. తాడిమర్రిలో దుండగుల దుశ్చర్య

శ్రీ సత్యసాయి జిల్లా: ధర్మవరం నియోజకవర్గం తాడిమర్రిలో మరోసారి దుండగులు దుశ్చర్యకు పాల్పడ్డారు. టీడీపీ సానుభూతిపరుడు, దళిత నాయకుడు గణేష్‌కు చెందిన చీనీచెట్లను దుండగులు నరికివేశారు. దీంతో తాడిమర్రి పోలీసు స్టేషన్ ముందు నరికి వేసిన చీనీచెట్లతో బాధిత రైతు గణేష్ కుటుంబ సభ్యులు నిరసనకు దిగారు. తాడిమర్రి ఎస్సై లక్ష్మీనారాయణ ప్రోద్బలంతోనే వైసీపీ నేతలు చీనీచెట్లు నరికి వేస్తున్నారని రైతు గణేష్ కుటుంబ సభ్యులు ఆరోపించారు. మూడు సంవత్సరాల వయసున్న చీనీ చెట్లు నరికి వేయడం దుర్మార్గపు చర్య అని గణేష్ తీవ్ర ఆవేదన వ్యక్తం చేశారు. ఇప్పటికే ఆర్థికంగా ఇబ్బందుల్లో ఉన్నామని... చెట్లను నరకకుండా తమను చంపేసి ఉంటే సరిపోయేదని వాపోయారు. చీనీచెట్లను నరికి వేసిన వైసీపీ గూండాలను తక్షణమే అరెస్ట్ చేయాలని బాధిత రైతు గణేష్ డిమాండ్ చేశారు.