Russia-Ukraine War : వ్లదిమిర్ పుతిన్ అరెస్ట్‌కు వారంట్
ABN , First Publish Date - 2023-03-18T12:45:16+05:30 IST
ఉక్రెయిన్‌పై యుద్ధం చేస్తున్న రష్యా అధ్యక్షుడు వ్లదిమిర్ పుతిన్ (Russian President Vladimir Putin) అరెస్ట్‌కు అంతర్జాతీయ నేర విచారణ
ది హేగ్ : ఉక్రెయిన్‌పై యుద్ధం చేస్తున్న రష్యా అధ్యక్షుడు వ్లదిమిర్ పుతిన్ (Russian President Vladimir Putin) అరెస్ట్‌కు అంతర్జాతీయ నేర విచారణ న్యాయస్థానం (International Criminal Court) శుక్రవారం వారంట్ జారీ చేసింది. చట్టవిరుద్ధంగా ఉక్రెయిన్ బాలలను రష్యాకు తీసుకెళ్లినందుకు ఈ చర్య తీసుకుంది. రష్యన్ బాలల హక్కుల కమిషన్ ప్రెసిడెన్షియల్ కమిషనర్‌ మరియా ల్వోవా-బిలోవాకు కూడా ఈ ఆరోపణలపై వారంట్‌ను జారీ చేసింది.
ఈ ఆదేశాలు చెల్లబోవని రష్యా పేర్కొంది. ఈ న్యాయస్థానానికి తాము పార్టీ కాదని చెప్పింది. అయితే ఉక్రెయిన్ ఈ చర్యలను స్వాగతించింది. ఇది చరిత్రాత్మక నిర్ణయమని ఉక్రెయిన్ అధ్యక్షుడు వోలోడిమిర్ జెలెన్‌స్కీ (Volodymyr Zelensky) ప్రశంసించారు.
ఉక్రెయిన్ ఆరోపణల ప్రకారం, 2022 ఫిబ్రవరి 24 నుంచి దాదాపు 16 వేల మంది ఉక్రెయినియన్ బాలలను రష్యాకు తీసుకెళ్లారు. వారిని రష్యాలోని అనాథాశ్రమాల్లో ఉంచారు.
ఐసీసీ ప్రాసిక్యూటర్ కరీం ఖాన్ ఓ వార్తా సంస్థతో మాట్లాడుతూ, పుతిన్ అరెస్ట్ చేయదగిన వ్యక్తి అని చెప్పారు. ఐసీసీకి 120 సభ్య దేశాలు ఉన్నాయని, వాటిలో ఏ దేశంలోనైనా ఆయన కాలు మోపితే, వెంటనే అరెస్ట్ చేయవచ్చునని తెలిపారు. రష్యన్ బాలల హక్కుల కమిషన్ ప్రెసిడెన్షియల్ కమిషనర్‌ మరియా ల్వోవా-బిలోవా గత ఏడాది ఫిబ్రవరిలో ఓ సమావేశంలో పుతిన్‌తో మాట్లాడుతూ, ధ్వంసమైన ఉక్రెయిన్ నగరం మరియుపోల్‌కు చెందిన 15 సంవత్సరాల బాలుడిని తాను దత్తత తీసుకున్నానని చెప్పారన్నారు. బాలల వసతి గృహాలను సురక్షిత ప్రాంతాలకు తరలించామని చెప్పినట్లు తెలిపారు. ఫోరెన్సిక్ ఎవిడెన్స్, స్క్రూటినీ, వీరిద్దరి మాటలు, తదితర అంశాల ఆధారంగా ఈ వారంట్లను జారీ చేసినట్లు తెలిపారు.
ఐసీసీ ప్రెసిడెంట్ పియోట్ర్ హొఫ్మన్‌స్కీ మాట్లాడుతూ, ఈ వారంట్ల అమలు అనేది అంతర్జాతీయ సహకారంపై ఆధారపడి ఉంటుందన్నారు.
ఐక్య రాజ్య సమితి భద్రతా మండలిలో సభ్యత్వం ఉన్న దేశానికి అధ్యక్ష పదవిలో కొనసాగుతున్న నేతకు అరెస్ట్ వారంట్ ఇవ్వడం ఐసీసీ చరిత్రలో మునుపెన్నడూ జరగలేదు.
ఇవి కూడా చదవండి :
Rahul Gandhi : చిక్కుల్లో రాహుల్‌?
India-Bangladesh : భారత్-బంగ్లాదేశ్ మైత్రీ పైప్‌లైన్ విశేషాలు ఎన్నో....!
