Davangere Jail: 40 అడుగుల జైలు గోడ ఇలా దూకేశాడేంటి.. వైరల్ వీడియో..!

దావణగెరె: కర్ణాటకలోని దావణగెరె సబ్ జైలు నుంచి ఒక రేప్ కేసు నిందితుడు తప్పించుకున్న ఘటనకు సంబంధించిన వీడియో సోషల్ మీడియాలో వైరల్‌గా మారింది. ఆగస్ట్ 26న ఈ ఘటన జరిగినట్లు సమాచారం. 40 అడుగుల ఎత్తైన సబ్ జైలు గోడ దూకి నిందితుడు పారిపోతున్న ఘటన కలకలం రేపింది. తప్పించుకుని పారిపోయిన ఆ యువకుడి పేరు వసంత్ అని తెలిసింది. 23 ఏళ్ల వసంత్‌పై మహిళా పోలీస్ స్టేషన్‌లో రేప్ కేసు నమోదైంది. కోర్టులో హాజరుపరిచిన అనంతరం అతనిని జైలుకు తరలించారు. జైలుకు తరలించిన రోజుల వ్యవధిలో ఆ యువకుడు తప్పించుకోవడానికి ప్రయత్నించాడు. జైలు లోపల నిఘా తక్కువగా ఉండే ప్రాంతాన్ని చూసుకుని పారిపోయేందుకు పక్కాగా ప్లాన్ చేశాడు.

40 అడుగుల ఎత్తైన గోడను చూసి తొలుత జంకినప్పటికీ గాయాలపాలైనా సరే జైలు నుంచి తప్పించుకోవాలని మెంటల్‌గా ఫిక్స్ అయ్యాడు. ఆ క్రమంలోనే.. అదను చూసుకుని గోడ ఎక్కేసి దూకేశాడు. అక్కడ నుంచి పారిపోయాడు. అయితే.. ఈ ఘటనను సీరియస్‌గా తీసుకున్న పోలీసులు తప్పించుకుని 24 గంటలు కూడా గడవక ముందే వసంత్‌ను అరెస్ట్ చేశారు. తప్పించుకుని పారిపోయిన వసంత హవేరి జిల్లాలో ఉన్నట్లు తెలుసుకుని పోలీసులు అరెస్ట్ చేశారు. ఈ ఘటనకు సంబంధించిన వీడియో సామాజిక మాధ్యమాల్లో వైరల్‌గా మారింది.