BJP: వీరి కలయిక సార్వత్రికం కోసమేనా..?

- జేపీ నడ్డాతో అన్నామలై భేటీ

- లోక్‌సభ ఎన్నికలపై కసరత్తుకు చర్చ

అడయార్‌(చెన్నై): వచ్చే యేడాది జరుగనున్న పార్లమెంట్‌ ఎన్నికల్లో పార్టీ అనుసరించాల్సి వ్యూహంపై నడ్డా, అన్నామలై(Nadda, Annamalai) కూలంకషంగా చర్చించారా? వారి కలయిక అందుకేనన్నది విశ్వసనీయ సమాచారం. భారతీయ జనతా పార్టీ జాతీయ అధ్యక్షుడు జేపీ నడ్డాతో ఆ పార్టీ రాష్ట్ర అధ్యక్షుడు కె.అన్నామలై(K. Annamalai) గురువారం ఢిల్లీలో భేటీ అయ్యారు. గవర్నర్‌ ఆరు రోజుల ఢిల్లీ పర్యటన ముగించుకుని చెన్నై వచ్చిన మరునాడే జాతీయ అధ్యక్షుడితో అన్నామలై భేటీ కావడం రాజకీయాల్లో ఆసక్తిని రేకెత్తిస్తోంది. కాగా ఈ భేటీలో వచ్చే ఏడాది జరుగనున్న లోక్‌సభ ఎన్నికలపై చర్చ జరిగినట్లు తెలిసింది. అదే విధంగా తమ కూటమి పార్టీ అయిన అన్నాడీఎంకేపై విమర్శలు చేయవద్దని నడ్డా హితవు పలికినట్టు సమాచారం. అదేవిధంగా తాజా రాజకీయ పరిస్థితులతో పాటు పార్టీ పురోగతి, అన్నాడీంకే - బీజేపీ(AIADMK - BJP) స్నేహ సంబంధాలు, డీఎంకే ప్రభుత్వం, గవర్నర్‌ ఆధిపత్య పోరు, మంత్రి సెంథిల్‌ బాలాజీ(Minister Senthil Balaji) అరెస్టు వ్యవహారం, డీఎంకే(DMK) మంత్రులు, కీలక నేతల ఆస్తుల చిట్టా విడుదల తదితర అంశాలపై ఇద్దరు నేతలు చర్చించుకున్నారు. ఈ సందర్భంగా అన్నామలైకు జేపీ నడ్డా కొన్ని సూచనలు చేసినట్టు తెలుస్తోంది. ముఖ్యంగా వచ్చే లోక్‌సభ ఎన్నికల కోసం అన్నాడీఎంకేతో కలిసి పోటీ చేయనున్నామని, ఈ నెల 17వ తేదీన ఢిల్లీలో జరుగనున్న ఎన్డీయే కూటమి భాగస్వామ్య పార్టీల సమావేశానికి అన్నాడీఎంకేను ఆహ్వానించినట్టు చెప్పారు. అందువల్ల అన్నాడీఎంకే నేతలను టార్గెట్‌ చేస్తూ విమర్శలు చేయవద్దని సూచించినట్టు సమాచారం.

28 నుంచి అన్నామలై పాదయాత్ర

ఈ నెల 28న అన్నామలై పాదయాత్ర చేపట్టనున్నారు. ‘ఎన్‌ మణ్‌ - ఎన్‌ మక్కల్‌’ (నా మట్టి - నా ప్రజలు) అనే నినాదంతో ఆయన రామేశ్వరం నుంచి పాదయాత్ర చేపట్టనున్నారు. ఈ పాదయాత్రను కేంద్ర హోంమంత్రి అమిత్‌ షా ప్రారంభించనున్నారు. ఈ పాదయాత్రకు రావాలని జేపీ నడ్డాని అన్నామలై ఆహ్వానించినట్లు బీజేపీ వర్గాలు పేర్కొన్నాయి.