Chief Minister: లగ్జరీ విమానంలో సీఎం ప్రయాణం.. మండిపడ్డ బీజేపీ

బెంగళూరు, (ఆంధ్రజ్యోతి): ముఖ్యమంత్రి సిద్దరామయ్య(Chief Minister Siddaramaiah)తో పాటు మంత్రులు కృష్ణభైరేగౌడ, జమీర్‌ అహ్మద్‌ఖాన్‌ ఖరీదైన జెట్‌ విమాన ప్రయాణానికి సంబంధించిన ఫొటో ఒకటి సోషల్‌ మీడియాలో భారీగా వైరల్‌ అవుతోంది. మంత్రి జమీర్‌ అహ్మద్‌ స్వయంగా దీన్ని పోస్ట్‌చేయడం గమనార్హం. దీనిపై బీజేపీ(BJP) ఘాటుగా స్పందించింది. రాష్ట్ర ప్రజలు కరువు కోరల్లో చిక్కుకుని విలవిల్లాడుతూంటే సీఎం ఖరీదైన విమానాల్లో సంచరిస్తున్నారని బీజేపీ రాష్ట్ర అధ్యక్షుడు బీవై విజయేంద్ర(BJP state president B Y Vijayendra) విమర్శించారు. రాష్ట్రంలో కాంగ్రెస్‌ అధికార పగ్గాలు చేపట్టి ఆరునెలలు దాటినా ఇంతవరకు ఒక్క అభివృద్ధి కార్యక్రమాన్ని చేపట్టలేదని, ఇప్పుడు ప్రజాధనాన్ని ఇలా విలాసాలకు దుర్వినియోగం చేస్తున్నారని ఆయన ఆగ్రహం వ్యక్తం చేశారు. ఈ మేరకు ‘ఎక్స్‌’లో ఆయన శుక్రవారం పోస్ట్‌చేశారు. దీనిపై కాంగ్రెస్‌ స్పందిస్తూ ప్రధాని నరేంద్రమోదీ రోజుల కొద్దీ చేపట్టిన విదేశీ పర్యటనలు, ఆయన ధరించే ఖరీదైన దుస్తుల మాటేమిటి..? అంటూ ఎద్దేవా చేసింది. రెగ్యులర్‌ విమానాలు అందుబాటులో లేకపోవడంతో ముఖ్యమంత్రి తన ఢిల్లీ పర్యటన ముగించుకుని జెట్‌ విమానంలో వచ్చారని, కేవలం రాజకీయ దురుద్దేశ్యంతోనే బీజేపీ విమర్శలు చేస్తోందని కాంగ్రెస్‌ మండిపడింది.