Former Minister: అసలు రూ.42 కోట్లతో ఫార్ములా రేస్‌-4 అవసరమా? సీఎం పగటికలలు కంటున్నారు..

- మాజీ మంత్రి జయకుమార్‌

పెరంబూర్‌(చెన్నై): ఆసుపత్రుల్లో మందుల కొరత ఏర్పడిన సమయంలో, రూ.42 కోట్లతో ఫార్ములా రేస్‌ కారు పందెం అవసరమా అంటూ అన్నాడీఎంకే మాజీ మంత్రి డి.జయకుమార్‌(Former Minister Jayakumar) ప్రభుత్వాన్ని ప్రశ్నించారు. స్థానిక రాయపురంలో ఆదివారం జరిగిన ఓటరు జాబితా సవరణ శిబిరాలను పరిశీలించిన జయకుమార్‌ విలేకరులతో మాట్లాడుతూ... రాబోయే పార్లమెంటు ఎన్నికల్లో 40 స్థానాలు గెలుస్తామని ముఖ్యమంత్రి పగటి కలలు కంటున్నారన్నారు. డీఎంకే ప్రభుత్వంపై ప్రజలు అసంతృప్తితో ఉన్న విషయమై అర్ధమైన సీఎం ఇలాంటి వ్యాఖ్యలు చేస్తున్నారని ఆరోపించారు. రైతులపై గూండా చట్టం ప్రయోగించిన ఏకైన ప్రభుత్వం డీఎంకే అని, ఈ వ్యవహారంపై కూటమి పార్టీలు నోరు మెదపకపోవడం ఆశ్చర్యంగా ఉందని జయకుమార్‌ పేర్కొన్నారు.