Joshimath crisis: జోషీమఠ్‌లో 500 ఇళ్లకు పగుళ్లు... ప్రధాన మంత్రి కార్యాలయం కీలక సమావేశం...
ABN , First Publish Date - 2023-01-08T14:08:19+05:30 IST
ఉత్తరాఖండ్‌లోని జోషీమఠ్‌లో భూమి కుంగిపోయి, దాదాపు 500 ఇళ్లకు పగుళ్లు రావడంతో ప్రధాన మంత్రి కార్యాలయం
న్యూఢిల్లీ : ఉత్తరాఖండ్‌లోని జోషీమఠ్‌లో భూమి కుంగిపోయి, దాదాపు 500 ఇళ్లకు పగుళ్లు రావడంతో ప్రధాన మంత్రి కార్యాలయం (PMO) చర్యలు ప్రారంభించింది. ఈ సమస్యపై చర్చించేందుకు ఉన్నత స్థాయి సమావేశాన్ని ఏర్పాటు చేసింది. బదరీనాథ్, హేమకుండ్ సాహిబ్, అంతర్జాతీయ స్కీయింగ్ సైట్ ఔలీ వంటి ప్రజాదరణగల ప్రదేశాలు ఇక్కడ ఉన్న సంగతి తెలిసిందే.
జోషీమఠ్‌లోని భూమి క్రమంగా కుంగిపోతుండటంతో రోడ్లు, ఇళ్లకు పెద్ద పగుళ్లు వస్తున్నాయి. ఓ దేవాలయం, కొన్ని ఇళ్లు కూలిపోయాయి. దీంతో ప్రజలు తీవ్ర ఆందోళనకు గురవుతున్నారు. ఈ నేపథ్యంలో ప్రధాన మంత్రి నరేంద్ర మోదీ (Narendra Modi)కి ప్రిన్సిపల్ సెక్రటరీ డాక్టర్ పీకే మిశ్రా నేతృత్వంలో సమీక్షా సమావేశం ఆదివారం జరుగుతుందని పీఎంఓ తెలిపింది. ఈ సమావేశంలో కేబినెట్ సెక్రటరీ, కేంద్ర ప్రభుత్వ సీనియర్ అధికారులు, జాతీయ విపత్తు నిర్వహణ సంస్థ (NDMA) సభ్యులు ఈ సమావేశంలో పాల్గొంటారని పేర్కొంది. జోషీమఠ్ జిల్లా అధికారులు, ఉత్తరాఖండ్ రాష్ట్ర ప్రభుత్వ ఉన్నతాధికారులు వీడియో కాన్ఫరెన్సింగ్ ద్వారా ఈ సమావేశంలో పాల్గొంటారని తెలిపింది.
ఇదిలావుండగా, జోషీమఠ్‌లో ఓ దేవాలయం, కొన్ని ఇళ్లు కూలిపోయిన నేపథ్యంలో పరిస్థితిని సమీక్షించేందుకు ఉత్తరాఖండ్ ముఖ్యమంత్రి పుష్కర్ సింగ్ ధామి శనివారం పర్యటించారు. ఈ ప్రభావానికి గురైన సుమారు 600 కుటుంబాలను సురక్షిత ప్రాంతానికి తరలించాలని ఆదేశించారు.
మరోవైపు భూమి కుంగిపోవడానికి కారణాలేమిటో అత్యంత వేగంగా అధ్యయనం చేసేందుకు కేంద్ర ప్రభుత్వం నిపుణుల కమిటీని ఏర్పాటు చేసింది.
