State President: థ్యాంక్యూ మంత్రిగారూ.. మీవల్ల మా పార్టీ అభివృద్ధి చెందుతోంది..

ప్యారీస్‌(చెన్నై): రాష్ట్ర యువజన సంక్షేమం, క్రీడల శాఖ మంత్రి ఉదయనిధి స్టాలిన్‌(Minister Udayanidhi Stalin) సనాతన ధర్మం గురించి వ్యాఖ్యానించడం వల్ల బీజేపీ అభివృద్ధి చెందుతోందని ఆ పార్టీ రాష్ట్ర అధ్యక్షుడు అన్నామలై(State President Annamalai) అభిప్రాయం వ్యక్తం చేశారు. స్వాతంత్య్ర సమరయోధుడు ఇమ్మానువేల్‌ శేఖర్‌ 66వ వర్ధంతి సందర్భంగా రామనాథపురం జిల్లా పరమకుడిలో ఆయన స్మారక మందిరంలో అంజలి ఘటించారు. ఈసందర్భంగా ఆయన మీడియాతో మాట్లాడుతూ.. రాష్ట్రప్రభుత్వం తరఫున ఇమ్మానువేల్‌శేఖర్‌ ఘనత చేకూర్చే విధంగా ఆయన విగ్రహంతో మణిమండపం ఏర్పాటు చేయనున్నట్లు సీఎం స్టాలిన్‌(CM Stalin) చేసిన ప్రకటనను ఆహ్వానిస్తున్నామని తెలిపారు. సనాతన ధర్మంపై తలెత్తిన సమస్యలో మంత్రి ఉదయనిధి స్టాలిన్‌ తలకు రేటు నిర్ణయించిన వ్యక్తి నకిలీ పూజారి అని, ఆయన చర్యలను బీజేపీ తరఫున ఖండిస్తున్నట్లు తెలిపారు. రాష్ట్ర మంత్రి వర్గంలో ఉదయనిధి వచ్చాక బీజేపీకి రాష్ట్రంలో ప్రజాదరణ పెరుగుతూ వస్తోందని, ముఖ్యంగా యువత పార్టీలో చేరుతున్నారని అన్నామలై తెలిపారు.