ఎండాకాలం మొదలయ్యి, కాస్త వేడి పెరిగిందంటే పలుచని పానీయాలను తాగాలని అనుకుంటారు. వేడికి తగ్గట్టు దాహం కూడా ఉంటుంది కనుక ప్రతి ఒక్కరూ వేసవి కాలంలో దాహం తీర్చుకోవడానికి రకరకాల డ్రింక్స్ తీసుకుంటూ ఉంటాం. ఎందుకంటే శరీరాన్ని హైడ్రేటెడ్‌గా ఉంచడానికి, ఆహారం కంటే ఎక్కువ పానీయాలు అవసరం. ఇలాంటి పరిస్థితుల్లో వేసవిలో మజ్జిగ, లస్సీ పానీయాల జాబితాలో ముందుస్థానంలో ఉంటాయి. ఈ పానీయాలు రుచికరంగానే కాదు, పోషకాలతో నిండి ఉంటాయి. ఈ రెండు వేసవి పానీయాలు ఒకేలా కనిపిస్తాయి, కానీ వాటి రుచిలో చాలా తేడా ఉంది. మజ్జిగను సుగంధ ద్రవ్యాలతో తయారు చేస్తే, లస్సీని పాలు, క్రీమ్, చక్కెర, పండ్ల తీపి రుచులతో తయారు చేస్తారు.

మజ్జిగ తయారీ ప్రక్రియలో, లాక్టోస్ లాక్టిక్ ఆమ్లంగా మారుతుంది. అందువల్ల తేలికగా జీర్ణమవుతుంది. లాక్టోస్‌కు అలెర్జీ ఉన్నవారికి మజ్జిగ మంచి ప్రత్యామ్నాయం. మరోవైపు పెరుగుతో చేసిన లస్సీ శరీరానికి చల్లదనాన్ని అందిస్తుంది. లస్సీని అనేక రుచులలో తయారు చేస్తారని మనకు తెలుసు. అయితే మజ్జిగ, లస్సీలలో ఏది బెస్ట్? ఎందులో ఆరోగ్య ప్రయోజనాలు ఎక్కువో తెలుసా?

మజ్జిగ, లస్సీ మధ్య తేడా ఏమిటి?

రుచి విషయానికొస్తే, మజ్జిగ ఉప్పగా ఉంటుంది, అయితే లస్సీ రుచిలో తీపిగా ఉంటుంది.

మజ్జిగ కంటే లస్సీ ఎక్కువ ఆమ్లత్వం కలిగి ఉంటుంది.

మజ్జిగ పలుచగా, లస్సీ మందంగా ఉంటుంది.

మజ్జిగను జీలకర్ర పొడి, కొత్తిమీర, నల్ల ఉప్పు వంటి ఆరోగ్యకరమైన పదార్థాలతో తయారుచేస్తారు.

లస్సీలో చక్కెర, పాలు, పండ్లు కలుపుతారు.

ఇదికూడా చదవండి: ఈ మామిడి పండ్లు.. చెట్టుపై పండినవా..? రసాయనాలతో మాగించినవా..? ఈ చిట్కాలతో తేల్చేయడం యమా ఈజీ..!

మజ్జిగ పోషకాలు

మజ్జిగలో ప్రోబయోటిక్స్ పుష్కలంగా ఉన్నాయి. మజ్జిగ తీసుకోవడం వల్ల రోగనిరోధక శక్తి పెరుగుతుంది. మజ్జిగలో జింక్, కాల్షియం, విటమిన్-బి12, ప్రొటీన్లు ఉంటాయి. విటమిన్-బి 12 సహాయంతో, రక్తంలో గ్లూకోజ్‌ను శక్తిగా మార్చడం సులభం అవుతుంది. విటమిన్ బి12 లోపం వల్ల మలబద్ధకం వస్తుంది. అందుకే రోజూ మజ్జిగ తాగడం వల్ల మలబద్ధకం నుంచి ఉపశమనం కలుగుతుంది.

లస్సీలోని పోషకాలు

ఇందులో కాల్షియం, పొటాషియం, ఫాస్పరస్ వంటి పోషకాలు పుష్కలంగా ఉన్నాయి. లస్సీలో ఉండే క్యాల్షియం ఎముకలను దృఢపరచడంలో సహాయపడుతుంది. లస్సీలో రైబోఫ్లావిన్, పొటాషియం ఉండటం వల్ల బీపీని అదుపులో ఉంచుతుంది. లస్సీలో లాక్టిక్ యాసిడ్ ఉంటుంది. ఇది శరీరం రోగనిరోధక శక్తిని పెంచడంలో సహాయపడుతుంది.

లస్సీ, మజ్జిగ ఏది మంచిది?

రెండింటినీ పోల్చి చూస్తే, మజ్జిగ ఒక విధంగా ఆరోగ్యకరం. 1 గ్లాసు మజ్జిగలో 40 నుండి 45 కేలరీలు, లస్సీలో 150 నుండి 200 కేలరీలు లభిస్తాయి. లస్సీ తాగడం వల్ల బరువు పెరుగుతారు. మరోవైపు, మజ్జిగ లస్సీ కంటే తేలికైనది. ఇది కఫా దోషాన్ని పెంచదు. అయితే, రెండు పానీయాలు జీర్ణక్రియను సులభతరం చేస్తాయి.