అబుదాబి: యునైటెడ్ అరబ్ ఎమిరేట్స్‌లో (UAE) జరిగిన పడవ ప్రమాదంలో ఓ భారతీయ యువకుడు ప్రాణాలు కోల్పోయాడు. మృతుడిని కేరళలోని కాసర్‌గోడ్‌ (Kasaragod) వాసి అభిలాష్‌‌గా(Abhilash) గుర్తించారు. ఆదివారం ఖోర్‌ఫక్కన్‌లో (Khor Fakkan) జరిగిన ఈ పడవ ప్రమాదంలో ఒక చిన్నారి సహా మరో ముగ్గురు తీవ్రంగా గాయపడ్డారు. వీరిలో తిరువనంతపురానికి చెందిన చిన్నారి పరిస్థితి విషమంగా ఉంది. ఖోర్‌ఫక్కన్‌లో తన సహోద్యోగులతో కలిసి అభిలాష్ ఈద్ జరుపుకునేందుకు వెళ్తుండగా ఈ ప్రమాదం జరిగింది. ప్రమాదం జరిగిన సమయంలో పడవలో 16 మంది ప్రయాణికులు, ఇద్దరు సిబ్బంది ఉన్నట్లు తెలుస్తోంది.

పడవ (Boat) సామర్థ్యానికి మించి ప్రయాణీకులు ఎక్కడం వల్లే ప్రమాదం జరిగినట్లు పోలీసులు ప్రాథమికంగా నిర్థారించారు. అంతేగాక వేగంగా ప్రయాణించడం కూడా మరో కారణంగా పడవలో ప్రయాణించిన వారు చెప్పారు. ఒడ్డు నుంచి కేవలం 1.5 కిలోమీటర్ల దూరంలోనే పడవ బోల్తా (Boat Accident) పడిందని ప్రమాదం నుంచి తప్పించుకున్న ఓ వ్యక్తి తెలిపాడు. అభిలాష్ మృతదేహాన్ని పోలీసులు ఫుజైరహా (Fujairah) ప్రభుత్వాస్పత్రికి తరలించారు. అతడు గడిచిన ఏడేళ్లుగా షార్జాలోని (Sharjah) ఓ ప్రైవేట్ కంపెనీలో పని చేస్తున్నాడు. అతడికి భార్య అశ్వతి, కుమార్తె అభయ, సోదరుడు అజీష్ ఉన్నారు. అభిలాష్ మృతితో కుటుంబ సభ్యులు, బంధువులు, స్నేహితులు కన్నీరుమున్నీరు అవుతున్నారు. అతడి స్వగ్రామం కాసర్‌గోడ్‌లో విషాదం అలుముకుంది.

Indian American: అగ్రరాజ్యం అమెరికాలో భారత సంతతి మహిళకు అరుదైన గౌరవం..!