AUS Vs AFG: అదరగొట్టిన ఆప్ఘనిస్తాన్.. ఆస్ట్రేలియా ముందు భారీ టార్గెట్

వన్డే ప్రపంచకప్‌లో అద్భుత ప్రదర్శన చేస్తున్న ఆప్ఘనిస్తాన్ ముంబై వేదికగా ఆస్ట్రేలియాతో జరుగుతున్న మ్యాచ్‌లోనూ బ్యాటింగ్‌లో అదరగొట్టింది. టాస్ గెలిచి బ్యాటింగ్ ఎంచుకున్న ఆప్ఘనిస్తాన్ బలమైన ఆస్ట్రేలియా బౌలింగ్‌ను ఎదుర్కొని నిర్ణీత ఓవర్లు ఆడటంతో పాటు 5 వికెట్ల నష్టానికి 291 పరుగుల స్కోరు సాధించింది. ముఖ్యంగా ఓపెనర్ ఇబ్రహీం జాద్రాన్ చివరి వరకు క్రీజులో నిలబడి సెంచరీ సాధించడమే కాకుండా అజేయుడిగా నిలిచాడు. అతడు 143 బాల్స్‌లో 8 ఫోర్లు, 3 సిక్సర్లతో 129 నాటౌట్‌గా నిలబడటంతో ఆప్ఘనిస్తాన్ ఫైటింగ్ స్కోరు చేయగలిగింది. గుర్భాజ్ (21), రహ్మత్ షా (30), కెప్టెన్ హష్మతుల్లా షాహిది (26), అజ్మతుల్లా ఒమర్‌జాయ్ (22), రషీద్ ఖాన్ (35 నాటౌట్) రాణించారు.

ఓపెనర్ జాద్రాన్‌కు ప్రపంచకప్ చరిత్రలో ఇదే తొలి సెంచరీ కాగా అది కూడా ఆస్ట్రేలియాపై ఈ ఫీట్ సాధించడం చాలా గొప్ప విషయం అని క్రికెట్ విశ్లేషకులు కొనియాడుతున్నారు. చివర్లో వచ్చిన రషీద్ ఖాన్ ఆసీస్ బౌలర్లకు చుక్కలు చూపించాడు. అతడు 18 బాల్స్‌లో 2 ఫోర్లు, 3 సిక్సర్లతో 35 పరుగులు సాధించాడు. ఆస్ట్రేలియా బౌలర్లలో హేజిల్‌వుడ్ 2 వికెట్లు సాధించగా.. స్టార్క్, మ్యాక్స్‌వెల్, జంపా తలో వికెట్ పడగొట్టారు. సెమీస్ బెర్త్ సాధించాలంటే ఆప్ఘనిస్తాన్ ఈ మ్యాచ్‌లో గెలవడం చాలా ముఖ్యం. భారీ తేడాతో గెలిస్తే వాళ్లకు సెమీస్ అవకాశాలు మంచిగా ఉంటాయి. ప్రస్తుతం న్యూజిలాండ్, పాకిస్థాన్‌లతో సమానంగా ఆప్ఘనిస్తాన్‌కు 8 పాయింట్లు ఉన్నాయి. ఈ మ్యాచ్ గెలిస్తే 10 పాయింట్లతో టేబుల్‌లో ఆప్ఘనిస్తాన్ నాలుగో స్థానం సంపాదించే అవకాశం ఉంటుంది. అంతేకాకుండా తమ చివరి మ్యాచ్‌లో న్యూజిలాండ్ తప్పనిసరిగా శ్రీలంకపై గెలవాల్సి ఉంటుంది.