Mohammed Shami: వరల్డ్ కప్‌లో పేసర్ మహ్మద్ షమీ రికార్డ్.. ఇప్పటివరకు ఏ భారతీయ బౌలర్ సాధించని ఫీట్ ఇది

ధర్మశాల: ఆదివారం ధర్మశాల వేదికగా న్యూజిలాండ్‌పై చెలరేగిన స్పీడ్‌స్టర్ మహ్మద్ షమీ.. మొదటి నాలుగు మ్యాచ్‌ల్లో ఎందుకు పక్కన పెట్టారనే ప్రశ్నలు ఉత్పన్నమయ్యేలా రాణించాడు. పటిష్ట బ్యాటింగ్ లైనప్ ఉన్న కివీస్‌ను 273 పరుగులకే కట్టడి చేయడంలో అత్యంత కీలక పాత్ర పోషించాడు. ఈ వరల్డ్ కప్‌లో ఆడిన తొలి మ్యాచ్‌లోనే 5 వికెట్లు తీసి శెభాష్ అనిపించుకున్నాడు. ఈ అద్భుత ప్రదర్శన ద్వారా వరల్డ్ కప్‌లో అరుదైన రికార్డును షమీ నెలకొల్పాడు.

వన్డే ప్రపంచకప్ చరిత్రలో రెండుసార్లు 5 వికెట్లు తీసిన తొలి భారతీయ బౌలర్‌గా నిలిచాడు. 2019 ప్రపంచ కప్‌లో ఇంగ్లండ్‌పై మొదటి 5 వికెట్లు సాధించగా తాజాగా న్యూజిలాండ్‌పై మరోసారి 5 వికెట్ల ఫీట్ సాధించాడు. కపిల్ దేవ్, వెంకటేష్ ప్రసాద్, రాబిన్ సింగ్, ఆశిష్ నెహ్రా, యువరాజ్ సింగ్ భారత్ తరుపున 5 వికెట్లు తీశారు. కానీ వరల్డ్ కప్‌లో రెండుసార్లు 5 వికెట్లు తీసిన ఏకైక బౌలర్ మాత్రం మహ్మద్ షమీనే. ఆస్ట్రేలియాకు చెందిన మిచెల్ స్టార్క్ అత్యధికంగా మూడుసార్లు వరల్డ్ కప్‌లో 5 వికెట్లు పడగొట్టి మొదటి స్థానంలో ఉన్నాడు. వరల్డ్ కప్‌లో స్టార్క్ మినహా ఇతర బౌలర్లు ఎవరూ 2 సార్లు కంటే ఎక్కువ 5 వికెట్స్ రికార్డ్ సాధించలేకపోయారు.

కాగా మహ్మద్ షమీ 2015లో తొలిసారి ప్రపంచకప్‌లో ఎంట్రీ ఇచ్చాడు. ప్రపంచ కప్‌లో అతడు సాధించిన మొత్తం వికెట్ల సంఖ్య 36గా ఉంది. న్యూజిలాండ్‌పై నమోదు చేసిన 5/54 అత్యుత్తమ గణాంకంగా ఉంది. ఒకానొక దశలో న్యూజిలాండ్ స్కోరు 300 దాటడం ఖాయమరి అనిపించింది. కానీ కీలకమైన వికెట్లు పడగొట్ట ఆ జట్టు స్కోరుని నియంత్రించడంలో షమీ అత్యంత కీలకపాత్ర పోషించాడు.