Social Media: అభిమానుల మధ్య చిచ్చు.. ట్రెండింగ్‌లో ‘SHAME ON STAR SPORTS’

వన్డే ప్రపంచకప్‌ను ప్రత్యక్ష ప్రసారం చేస్తున్న స్టార్ స్పోర్ట్స్ ఛానల్‌పై టీమిండియా అభిమానులు ఆగ్రహం వ్యక్తం చేస్తున్నారు. టీమిండియా విజయాలకు సంబంధించి కేవలం ఒక వ్యక్తికి మాత్రమే స్టార్ స్పోర్ట్స్ క్రెడిట్ ఇవ్వడాన్ని పలువురు తప్పుబడుతున్నారు ఈ అంశానికి సంబంధించి సదరు ఛానల్ విడుదల చేసిన ప్రోమో విషయంలో రోహిత్ శర్మ, విరాట్ కోహ్లీ అభిమానుల మధ్య కామెంట్ల యుద్ధం నడుస్తోంది. ఈ ప్రోమోలో ఎక్కువగా మ్యాన్ ఆఫ్ ది మ్యాచ్ వరించిన ఆటగాళ్లను స్టార్ స్పోర్ట్స్ ఛానల్ చూపించడం వివాదానికి దారి తీసింది. ప్రోమోలో కెప్టెన్ రోహిత్ శర్మ లేకపోవడంతో అతడి ఫ్యాన్స్ తీవ్ర స్థాయిలో ఫైరవుతున్నారు. ఆఫ్ఘానిస్తా్న్‌తో జరిగిన మ్యాచ్‌లో రోహిత్ శర్మ సెంచరీ చేసి మ్యాన్ ఆఫ్ ది మ్యాచ్ అవార్డును గెలుపొందిన సంగతిని గుర్తుచేస్తున్నారు. మెగా టోర్నీలో అతడు హాఫ్ సెంచరీలు, సెంచరీలు ఎక్కువ చేయకపోయినా తొలి మ్యాచ్ మినహా అన్ని మ్యాచ్‌లలో రాణించినట్లు కామెంట్ చేస్తున్నారు.

కాగా కింగ్ విరాట్ కోహ్లీ మెగా టోర్నీలో ఇప్పటి వరకు రెండు సెంచరీలు సాధించాడు. జట్టు కష్టాల్లో ఉన్నప్పుడు ఆదుకున్నాడు. ఆస్ట్రేలియాతో మ్యాచ్‌లో టీమిండియా కష్టాల్లో ఉన్నప్పుడు సహనంగా బ్యాటింగ్ చేసి రాహుల్‌తో కలిసి కీలక భాగస్వామ్యం నెలకొల్పాడు. అయితే స్టార్ స్పోర్ట్స్ విడుదల చేసిన ప్రోమో చూశాక విరాట్ కోహ్లీ అభిమానులు ఆనందంగా ఉంటే.. రోహిత్ అభిమానులు మాత్రం ఆగ్రహంతో ఉన్నారు. టీమిండియా కెప్టెన్ రోహిత్ శర్మకు వరల్డ్ కప్ ప్రోమోలో చోటు ఇవ్వకపోవడం సరికాదని మండిపడుతున్నారు. దీంతో రోహిత్ అభిమానులు స్టార్ స్పోర్ట్స్ ఛానల్‌పై ఆగ్రహం వ్యక్తం చేస్తున్నారు. టీమిండియా కెప్టెన్‌కు కనీస గౌరవం ఇవ్వలేరా అంటూ కామెంట్స్ చేస్తున్నారు. షేమ్ స్టార్ స్పోర్ట్స్ అంటూ సోషల్ మీడియాలో ట్రోలింగ్ చేస్తున్నారు.

మరిన్ని క్రీడావార్తల కోసం ఇక్కడ క్లిక్ చేయండి.