WPL 2023: ఢిల్లీ కేపిటల్స్ వీరబాదుడు.. యూపీ ఎదుట కొండంత లక్ష్యం

నవీముంబై: మహిళల ప్రీమియర్ లీగ్‌(WPL)లో భాగంగా యూపీ వారియర్స్‌(UP Warriorz)తో జరుగుతున్న మ్యాచ్‌లో ఢిల్లీ కేపిటల్స్(Delhi Capitals) భారీ స్కోరు సాధించింది. నిర్ణీత 20 ఓవర్లలో నాలుగు వికెట్ల నష్టానికి 211 పరుగులు సాధించి ప్రత్యర్థికి భారీ లక్ష్యాన్ని నిర్దేశించింది. ఇన్నింగ్స్ 9వ ఓవర్ వద్ద వర్షం కాసేపు మ్యాచ్‌కు అంతరాయం కలిగించినప్పటికీ ఆ తర్వాత తెరిపినివ్వడంతో మ్యాచ్ ప్రారంభమైంది.

ఢిల్లీ కెప్టెన్ మెగ్ లానింగ్(Meg Lanning) 42 బంతుల్లో 10 ఫోర్లు, మూడు సిక్సర్లతో 70 పరుగులు చేసి టాప్ స్కోరర్‌గా నిలిచింది. చివర్లో జెమీమీ రోడ్రిగ్స్, జెస్ జొనాసెన్ చితక్కొట్టేశారు. ఇద్దరూ కలిసి యూపీ బౌలర్లను ఉతికి ఆరేశారు. రోడ్రిగ్స్ 22 బంతుల్లో 4 ఫోర్లతో 34 పరుగులు చేయగా, జొనాసెన్ 20 బంతుల్లో 3 ఫోర్లు, 3 సిక్సర్లతో 42 పరుగులు చేయడంతో జట్టు స్కోరు 200 పరుగులు దాటింది. షెఫాలీ వర్మ 17, మరిజాన్ కాప్ 16, అలిస్ కాప్సే 21 పరుగులు చేశారు.