IND vs SA: భారత్, సౌతాఫ్రికా వన్డే సిరీస్‌ను ఉచితంగా ఎక్కడ? ఎలా చూడాలంటే..?

జోహన్నెస్‌బర్గ్: భారత్, సౌతాఫ్రికా టీ20 సిరీస్ ముగిసింది. ఇక వన్డే సమరానికి సమయం ఆసన్నమైంది. టీ20 సిరీస్ సమం కావడంతో ఎలాగైనా వన్డే సిరీస్‌ను గెలుచుకోవాలని రెండు జట్లు పట్టుదలగా ఉన్నాయి. ఈ నేపథ్యంలో ఆదివారం జరిగే మొదటి వన్డే మ్యాచ్‌లో రెండు జట్లు గెలుపే లక్ష్యంగా బరిలోకి దిగుతున్నాయి. రెండు జట్ల మధ్య జరిగిన చివరి 3 వన్డేల్లో టీమిండియానే గెలవడం గమనార్హం. ఇటీవల ముగిసిన ప్రపంచకప్‌లో కూడా సౌతాఫ్రికాను టీమిండియా ఓడించింది. ఇది భారత్ కు ఆత్మవిశ్వాసాన్ని ఇచ్చే విషయం. అలాగే ప్రపంచకప్ హాట్‌ఫేవర్లుగా కనిపించిన భారత్, సౌతాఫ్రికా చివరకు ట్రోఫీని గెలవడంలో విఫలమయ్యాయి. ప్రపంచకప్ ముగిసిన తర్వాత రెండు జట్లు ఆడుతున్న వన్డే సిరీస్ ఇదే కావడంతో ఆసక్తి నెలకొంది. ఈ సిరీస్‌లో రోహిత్ శర్మ, విరాట్ కోహ్లీ, జస్ప్రీత్ బుమ్రా వంటి భారత సీనియర్ ఆటగాళ్లెవరూ ఆడడం లేదు. దీంతో దాదాపు పూర్తిగా యువ జట్టే బరిలోకి దిగుతోంది.

అలాగే రోహిత్ శర్మ తర్వాత వన్డే కెప్టెన్ అయ్యేందుకు కేఎల్ రాహుల్‌కు ఇది మంచి అవకాశంగా చెప్పుకోవచ్చు. గతంలో ఇదే సఫారీ గడ్డపై రాహుల్ కెప్టెన్సీలోనే టీమిండియా వన్డే సిరీస్ ఆడింది. కానీ అప్పుడు ఓటమి ఎదురైంది. ఈ సారి కూడా రాహుల్ కెప్టెన్సీలోనే బరిలోకి దిగుతుండడంతో తనను తాను నిరూపించుకునేందుకు ఇది మంచి అవకాశమని విశ్లేషకులు చెబుతున్నారు. ఇక నేడు జరగనున్న మొదటి మ్యాచ్‌తో రింకూ సింగ్ వన్డే క్రికెట్‌లోకి అరంగేట్రం చేసే అవకాశాలున్నాయి. నేడు మొదటి వన్డే జరగనుండగా, 19న రెండో వన్డే, 21న మూడో వన్డే జరగనుంది. మొదటి వన్డే మ్యాచ్ మధ్యాహ్నం 1:30 గంటలకు ప్రారంభం కానుండగా.. రెండు, మూడో వన్డేలు సాయంత్రం 4:30 గంటలకు ప్రారంభంకానున్నాయి. ఇక ఈ వన్డే సిరీస్‌ను ఉచితంగా చూడాలనుకునేవారు టీవీల్లో అయితే స్టార్ స్పోర్ట్స్ ఛానెల్‌లో చూడొచ్చు. ఓటీటీలో అయితే డిస్నీ+హాట్‌స్టార్‌లో చూడొచ్చు.