IND vs WI 1st Test: బ్యాడ్ న్యూస్.. మొదటి రోజు ఆటకు వర్షం ఆటంకం?

డొమినికా: భారత్, వెస్టిండీస్ మొదటి టెస్ట్ (India vs West Indies First Test) మ్యాచ్ కోసం ఆసక్తిగా ఎదురుచూస్తున్న క్రికెట్ అభిమానులకు మొదటి రోజు నిరాశే మిగిలే అవకాశాలున్నాయి. స్థానిక వాతావరణ నివేదికల ప్రకారం మ్యాచ్ జరగనున్న డొమినికాలోని విండ్సర్ పార్క్ మైదానంలో (Windsor Park, Dominica) బుధవారం వర్షం పడే (chances of rain) అవకాశాలున్నాయి. మొదటి రోజు ఆటలో మ్యాచ్ ప్రారంభం అయ్యే సమయానికి గాలులతో కూడిన వర్షం కురిసే అవకాశాలున్నాయి. రోజంతా వాతావరణం 59 శాతం మేఘావృతమై ఉంటుంది.

అయితే ఈ వర్షం రోజంతా ఉండకపోవచ్చు. దీంతో మొదటి రోజు మొత్తం కాకపోయినా కొంత మేరకు జరిగే అవకాశాలున్నాయి. విండ్సర్ పార్క్‌లో ఉష్ణోగ్రతలు ఇవాళ 25-31 డిగ్రీల సెల్సియస్ మధ్యనే ఉంటాయని వాతావరణ శాఖ తెలిపింది. కాగా మొదటి రోజు గాలులు ఉండడం పేస్ బౌలర్లకు కలిసి రానుంది. ఇది పిచ్‌పై పేసర్లు అదనపు స్వింగ్ రాబట్టడానికి దోహదపడుతుంది. అయితే మిగతా 4 రోజులు మాత్రం వర్షం నుంచి ఎలాంటి ముప్పు లేదని తెలుస్తోంది. కాకపోతే రెండవ రోజు, మూడవ రోజు ఆకాశం మేఘావృతమై ఉంటుంది. కానీ వర్షం వచ్చే అవకాశాలు చాలా తక్కువగా ఉన్నాయి. 4వ రోజు, 5వ రోజు వాతావరణం వేడిగా ఉండనుంది. కాబట్టి వర్షం వచ్చే అవకాశాలు లేవు.

ఇక మ్యాచ్ జరగనున్న విండ్సర్ పార్క్ పిచ్ రిపోర్టు విషయానికొస్తే.. మ్యాచ్ ఫలితంపై టాస్ ప్రభావం చూపే అవకాశాలు తక్కువగా ఉన్నాయి. మొదటి రోజు పిచ్ పేసర్లకు అనుకూలించే అవకాశాలున్నాయి. బ్యాటర్లు క్రీజులో కుదురుకుంటే పరుగులు రాబట్టవచ్చు. రెండు, మూడు రోజుల్లో బ్యాటింగ్‌కు అనుకూలించే అవకాశాలున్నాయి. ఇక నాలుగు, ఐదు రోజుల్లో స్పిన్నర్లు ప్రభావం చూపొచ్చు.