Gold: శంషాబాద్ ఎయిర్‌పోర్టులో భారీగా బంగారం పట్టివేత

హైదరాబాద్‌: శంషాబాద్ ఎయిర్‌పోర్టులో (Shamshabad Airport) భారీగా (gold) బంగారం పట్టుబడింది. రూ.16.5 లక్షల విలువైన 269 గ్రాముల బంగారాన్ని కస్టమ్స్ అధికారులు సీజ్‌ చేశారు. చాక్లెట్లలో బంగారం దాచి స్మగ్లింగ్ చేస్తున్న నిందితులను అధికారులు అదుపులోకి తీసుకున్నారు. ఇద్దరు దుబాయ్‌ ప్రయాణికులను అరెస్ట్‌ చేసినట్లు కస్టమ్స్‌ అధికారులు వెల్లడించారు.

ఇటీవల శంషాబాద్‌ అంతర్జాతీయ విమానాశ్రయంలో భారీగా బంగారం పట్టుబడింది. దుబాయ్‌ నుంచి వచ్చిన నలుగురు మహిళలు అక్రమంగా తరలిస్తున్న బంగారాన్ని కస్టమ్స్‌ అధికారులు స్వాధీనం చేసుకున్నారు. వివరాలు ఇలా ఉన్నాయి. దుబాయ్‌ నుంచి శంషాబాద్‌ ఎయిర్‌పోర్ట్‌కు వచ్చిన ఎయిరేట్స్‌ సంస్థకు చెందిన ఈకే 527 విమాన సర్వీసులో కొందరు మహిళా ప్రయాణికులు దొంగచాటుగా బంగారం తరలిస్తున్నట్టు ఎయిర్‌పోర్టు కస్టమ్స్‌ అధికారులకు సమాచారం అందింది.

దీంతో విమానం దిగిన నలుగురు మహిళా ప్రయాణికులపై అనుమానం రావడంతో వారి లగేజీలు తనిఖీ చేశారు. అందులో ఏమీ దొరకలేదు. మహిళలను స్కానింగ్‌ చేయగా వారి ప్రైవేట్‌ భాగాల్లో బంగారు గుళికలు ఉన్నట్టు తేలింది. దీంతో వారిని వైద్య విభాగానికి పంపి ఆపరేషన్‌ చేసి బంగారం గుళికలను బయటకు తీసి స్వాధీనం చేసుకున్నారు. వాటిని తూకం వేయగా 3.175 గ్రాముల బరువు ఉంది. దాని విలువ రూ. కోటి 94 లక్షల రూపాయలుంటుందని అధికారులు అంచనా వేశారు. మహిళలపై కేసు నమోదు చేశారు.