DK Aruna: ఈటలకు ఛాలెంజ్ చేయడం కాదు.. నువ్వు ప్రమాణం చేస్తావా..?

హైదరాబాద్: మునుగోడు ఉపఎన్నికలకు సంబంధించి బీజేపీ ఎమ్మెల్యే ఈటల రాజేందర్ (BJP MLA Etela Rejender) చేసిన వ్యాఖ్యలపై కాంగ్రెస్ నేతలు తీవ్రస్థాయిలో విరుచుకుపడుతున్నారు. చార్మినార్ భాగ్యలక్ష్మి అమ్మవారి ఆలయం వద్ద ప్రమాణం చేద్దాం రా అంటూ ఈటలకు రేవంత్ రెడ్డి (TPCC Chief Revanth Reddy) సవాల్ విసిరారు. ఈ క్రమంలో ఈటలకు బీజేపీ నేత డీకే అరుణ (BJP Leader DK Aruna) మద్దుతుగా నిలుస్తూ రేవంత్‌‌పై మండిపడ్డారు. ఓటుకు నోటు కేసులో తన ప్రమేయం లేదని ప్రమాణం చేస్తావా రేవంత్‌ అంటూ సవాల్ విసిరారు. తన ప్రమేయం లేకుంటే రేవంత్ రెడ్డి భుజాలు ఎందుకు తడుముకుంటున్నారని ప్రశ్నించారు. మునుగోడులో కాంగ్రెస్‌కు బీఆర్ఎస్ వంద శాతం ఆర్థిక సాయం చేసిందపని ఆరోపించారు. ఈటల రాజేందర్‌పై రేవంత్ కామెంట్స్‌ను తీవ్రంగా ఖండిస్తున్నామన్నారు. కాంగ్రెస్‌ను విమర్శిస్తే.. బీఆర్ఎస్ నేతలు ఎందుకు స్పందిస్తున్నారో చెప్పాలన్నారు. ఎన్నికల ముందా.. తర్వాత అనేది కాదు.. కాంగ్రెస్, బీఆర్ఎస్ కలిసేది పక్కా అని స్పష్టం చేశారు. రేవంత్ రెడ్డి ఇష్టానుసారం మట్లాడితే బీజేపీ చూస్తూ ఊరుకోదని డీకే అరుణ హెచ్చరించారు.