BJP: తెలంగాణ పార్టీ వ్యవహారాలను సెట్‌ చేసే పనిలో బీజేపీ హైకమాండ్.. హుటాహుటిన ఢిల్లీకి కిషన్‌రెడ్డి

హైదరాబాద్: తెలంగాణ బీజేపీలో (Telangana BJP) జరుగుతున్న పరిస్థితులను చక్కదిద్దేందుకు బీజేపీ అధిష్టానం రంగంలోకి దిగింది. ఇందులో భాగంగా కేంద్రమంత్రి కిషన్ రెడ్డికి (Union Minister Kishan Reddy) బీజేపీ హైకమాండ్ నుంచి పిలుపు వచ్చింది. దీంతో ఆయన హుటాహుటిన ఈరోజు మధ్యాహ్నం హైదరాబాద్ నుంచి ఢిల్లీకి బయలుదేరి వెళ్లనున్నారు. ఢిల్లీ పర్యటన నేపథ్యంలో హైదరాబాద్‌లో ఈరోజు కార్యక్రమాలను కేంద్రమంత్రి రద్దు చేసుకున్నారు. ఇప్పటికే పార్టీ హైకమాండ్ నుంచి బీజేపీ ఎమ్మెల్యే ఈటల రాజేందర్ (MLA Etela Rejender), కోమటిరెడ్డి రాజగోపాల్ రెడ్డికి (Komati reddy Rajagopal Reddy) పిలుపు వచ్చిన విషయం తెలిసిందే. ఈటల రాజేందర్, రాజగోపాల్ రెడ్డితో పార్టీ హైకమాండ్ భేటీలో కిషన్ రెడ్డి పాల్గొననున్నారు. హైకమాండ్ పిలుపుతో ఢిల్లీకి ఈటల, రాజగోపాల్ వెళ్లనున్న నేపథ్యంలో సర్వత్రా ఉత్కంఠ నెలకొంది.

కాగా... గత కొంతకాలంగా ఈటల రాజేందర్, కోమటిరెడ్డి రాజగోపాల్ రెడ్డి పార్టీ కార్యక్రమాలకు దూరంగా ఉంటూ వస్తున్నారు. ముఖ్యంగా బీజేపీ తెలంగాణ రెండు వర్గాలుగా విడిపోయిన పరిస్థితి. ఈ నేపథ్యంలో బండి సంజయ్ వర్గం, ఈటల వర్గానికి దూతగా కిషన్‌రెడ్డిని అధిష్టానం పిలిచినట్లు తెలుస్తోంది. వీరిద్దరి మధ్య సయోద్య కుదిర్చేందుకు కిషన్‌రెడ్డిని ఉపయోగించుకోవాలని హైకమాండ్ యోచిస్తున్నట్లు తెలుస్తోంది. రేపు తెలంగాణకు జాతీయ అధ్యక్షుడు జేపీ నడ్డా (BJP National Chief JP Nadda) రానున్నారు. ఈ క్రమంలో పార్టీ వ్యవహారాలను కాషాయ పార్టీ హైకమాండ్ సెట్ చేసే పనిలో పడింది. రేపు (ఆదివారం) ఉదయం పార్టీ ముఖ్య నేతలతో నడ్డా భేటీ అయ్యే అవకాశాలు కనిపిస్తున్నాయి.

రేపటి జేపీ నడ్డా తెలంగాణ పర్యటన షెడ్యూల్ ఇదే...

బీజేపీ జాతీయ అధ్యక్షులు జేపీ నడ్డా రేపు తెలంగాణకు రానున్నారు. ఈ పర్యటన ఏర్పాట్లను బీజేపీ రాష్ట్ర అధ్యక్షులు బండి సంజయ్ (Telangana BJP Chief Bandi Sanjay) దగ్గరుండి పర్యవేక్షిస్తున్నారు. భారీగా జనాన్ని సమీకరించేందుకు బీజేపీ ప్రణాళిక రూపొందిస్తోంది. నడ్డా మినిట్ టు మినట్ ప్రపోజల్ షెడ్యూల్‌ ఖరారైంది. నాగర్‌కర్నూల్‌లో జరిగే బహిరంగ సభలో నడ్డా పాల్గొననున్నారు. రేపు మధ్యాహ్నం 12:45 గంటలకు శంషాబాద్ ఎయిర్పోర్ట్‌కు నడ్డా చేరుకోనున్నారు.

• మధ్యాహ్నం 1:15 గంట నుంచి 2:30 గంటల వరకు సంపర్క్ సే అభియాన్‌లో భాగంగా ఇద్దరు ముఖ్యమైన వ్యక్తులను నడ్డా కలవనున్నారు.

• సాయంత్రం 3:00 గంటలకు నోవాటెల్ హోటల్‌కు నడ్డా చేరుకోనున్నారు.

• సాయంత్రం 4:00 గంటల వరకు నోవాటెల్ హోటల్లోనే నడ్డా స్టే చేస్తారు.

• సాయంత్రం 4:15 గంటలకు శంషాబాద్ ఎయిర్పోర్ట్ నుంచి నాగర్ కర్నూల్ సభకు హెలికాప్టర్‌లో నడ్డా బయలుదేరనున్నారు.

• సాయంత్రం 4:45 నిమిషాలకు నాగర్ కర్నూల్‌కు చేరుకోనున్నారు.

• సాయంత్రం 5 నుంచి 6 గంటల వరకు నాగర్ కర్నూల్ జడ్పీహెచ్ఎస్ స్కూల్ గ్రౌండ్‌లో ఏర్పాటు చేసిన సభలో నడ్డా ఉండనున్నారు.

• సాయంత్రం 6:10 నిమిషాలకు నాగర్ కర్నూల్ నుంచి జాతీయ అధ్యక్షులు బయలుదేరనున్నారు.

• సాయంత్రం 6:40 నిమిషాలకు శంషాబాద్ ఎయిర్ పోర్టుకు నడ్డా చేరుకోనున్నారు.

• సాయంత్రం 7:40 నిమిషాలకు ఎయిర్ పోర్ట్ నుంచి తిరువనంతపురానికి నడ్డా బయలుదేరనున్నారు.