YS Vijayamma: పోలీసులపై చేయిచేసుకున్న విజయమ్మ

హైదరాబాద్: నగరంలోని జూబ్లీహిల్స్ పోలీస్‌స్టేషన్ వద్ద ఉద్రిక్తత చోటు చేసుకుంది. వైఎస్సార్‌టీపీ చీఫ్ వైఎస్ షర్మిల అరెస్ట్ నేపథ్యంలో జూబ్లీహిల్స్ పోలీస్‌స్టేషన్‌కు వచ్చి వైఎస్ విజయమ్మ (YS Vijayamma) పోలీసులతో వాగ్వాదానికి దిగారు. ఈక్రమంలో ఓ మహిళా కానిస్టేబుల్‌పై ఆమె చేయిచేసుకున్నారు. షర్మిలను ఎందుకు అరెస్ట్ చేశారని ప్రశ్నించారు. పోలీసుల తీరుపై కోర్టుకు వెళ్లనున్నట్లు విజయమ్మ తెలిపారు. చివరకు విజయమ్మను పోలీసులు బలవంతంగా కారులో ఎక్కించి అక్కడి నుంచి పంపించి వేశారు. వైఎస్ షర్మిల పోలీసులపై చేయిచేసుకొని గంటలు కూడా గడవక ముందే వైఎస్ విజయమ్మ కూడా దురుసుగా ప్రవర్తించడం సర్వత్రా చర్చనీయాంశమైంది.

ఈరోజు ఉదయం టీఎస్‌పీఎస్సీ కేసుకు సంబంధించి సిట్ అధికారులను కలిసేందుకు బయలుదేరిన వైఎస్సార్టీపీ అధినేత్రి వైఎస్ షర్మిలను (YSRTP YS Sharmila) పోలీసులు అడ్డుకున్నారు. ఈ క్రమంలో లోటస్ పాండ్ వద్ద ఉద్రిక్తత చోటు చేసుకుంది. కారులో బయలుదేరేందుకు వెళ్తున్న షర్మిలను పోలీసులు అడ్డుకున్నారు. దీంతో పోలీసులతో షర్మిల వాగ్వాదానికి దిగారు. బయటకు వెళ్లేందుకు అనుమతిలేదని ఆమెను అడ్డుకునే ప్రయత్నం చేశారు. అయితే షర్మిల పోలీసులకు నచ్చజెప్పే ప్రయత్నం చేశారు. అయినా పోలీసులు వినిపించుకోలేదు. పోలీసులపై షర్మిల చేయి చేసుకున్నారు. పోలీసులు అడ్డుకోవడంతో షర్మిల రోడ్డుపై బైఠాయించి నిరసన తెలిపారు. దీంతో పోలీసులు ఆమెను అరెస్టు చేసి జూబ్లీహిల్స్‌ పోలీస్ స్టేషన్‌కు తరలించారు. విధుల్లో ఉన్న ఎస్‌ఐ, కానిస్టేబుల్‌పై చేయి చేసుకున్నందుకు షర్మిలపై ఐపీసీ 330, 353 సెక్షన్ల కింద కేసు నమోదు చేశారు. విషయం తెలిసిన వైఎస్ విజయమ్మ.. కూతురు షర్మిలను పరామర్శించేందుకు జూబ్లీహిల్స్ పోలీస్‌స్టేషన్‌కు వచ్చారు. విజయమ్మను పోలీసులు అడ్డుకోవడంతో విజయమ్మ అసహనం వ్యక్తం చేశారు. పోలీసులతో వాగ్వాదానికి దిగారు. ఈ క్రమంలో ఓ మహిళా కానిస్టేబుల్‌పై విజయమ్మ చేయి చేసుకున్నారు.