Viral Video: బస్సులో జనాలు.. మాజీ మంత్రి పేర్ని నాని డ్రైవింగ్

మచిలీపట్నం ఎమ్మెల్యే, మాజీ మంత్రి పేర్ని నానికి సంబంధించిన ఓ వీడియో ప్రస్తుతం సోషల్ మీడియాలో తెగ వైరల్ అవుతోంది. వీడియోలో మాజీ మంత్రి వైసీపీ టోపీ పెట్టుకుని ఎంచక్కా స్టీరింగ్ తిప్పుతూ బస్సును డ్రైవ్ చేస్తున్నారు. అంతేకాదు పక్కన వెళ్తున్న బస్సుకు నాని బై బై కూడా చెప్పారు. ఆ క్రమంలో బస్సులో అనేక మంది కార్యకర్తలు ఉండగా.. పేర్ని నాని డ్రైవింగ్ చేయడం చూసి సంతోషం వ్యక్తం చేశారు. వారిని దెందులూరులో సీఎం జగన్‌ సభకోసం మాజీ మంత్రి తీసుకెళ్లారు.

ఆంధ్రప్రదేశ్‌లో రాబోయే ఎన్నికల కోసం వైఎస్సార్‌సీపీ ప్రభుత్వం చేస్తున్న సన్నాహాల్లో భాగంగా ఈ కార్యక్రమం చేపట్టింది. దెందులూరు, ఏలూరులో సీఎం జగన్‌ కీలక సమావేశం నిర్వహిస్తున్నారు. ఈ కార్యక్రమంలో దాదాపు 50 నియోజకవర్గాలకు చెందిన వైఎస్సార్‌సీపీ కార్యకర్తలు, నాయకులు, ఎమ్మెల్యేలు, మంత్రులు పాల్గొంటున్నారు. ఈ నేపథ్యంలో అనేక మంది మద్దతుదారులను విస్తృతంగా సమీకరించారు. ఆ క్రమంలోనే వైఎస్‌ఆర్‌సీపీ ఎమ్మెల్యేలు, మంత్రులు ఏలూరుకు వెళ్లే మార్గంలో కార్యకర్తలను ఎక్కించుకుని స్వయంగా నాని బస్సు నడుపుతూ కనిపించారు. మాజీ మంత్రి స్వయంగా బస్సు నడుపుతున్న వీడియో ప్రస్తుతం సోషల్ మీడియాలో వైరల్‌గా మారింది.