Cyber Fraud: వీడు మహా కేటుగాడు.. వీడియో కాల్ చేసి, బాత్రూంకి కూడా వెళ్లనివ్వకుండా..

ప్రస్తుతం అందుబాటులో ఉన్న టెక్నాలజీని వినియోగించి.. సైబర్ నేరగాళ్లు రకరకాల మార్గాల ద్వారా అక్రమాలకు పాల్పడుతున్నారు. ఎలాగోలా అమాయకుల్ని మభ్యపెట్టి, వారి వద్ద నుంచి లక్షల రూపాయలు కాజేస్తున్నారు. ఓ కేటుగాడు కూడా అదే పని చేయబోయాడు. ఒక మహిళకు వీడియో కాల్ చేసి, రాత్రి నుంచి ఉదయం వరకూ మాట్లాడి, రూ.60 లక్షలో దోచేసేందుకు ప్రయత్నించాడు. చివరికి పోలీసులు రంగంలోకి దిగి, ఆ సొమ్ము ఆ దుండగుడికి ఖాతాలోకి వెళ్లనివ్వకుండా ఆపేశారు.

ఏ సాక్ష్యాలతో కేజ్రీవాల్‌ను అరెస్టు చేశారు: సుప్రీం

పూర్తి వివరాల్లోకి వెళ్తే.. హైదరాబాద్‌కు చెందిన ఓ మహిళకు ఈ నెల 15వ తేదీన గుర్తుతెలియని వ్యక్తి నుంచి ఫోన్‌ వచ్చింది. ఆ ఫోన్‌కాల్ లిఫ్ట్ చేయగానే.. అవతలి వ్యక్తి తనని తాను మహారాష్ట్ర పోలీస్ ఆఫీసర్‌గా పరిచయం చేసుకున్నాడు. తనతో ఏం పని అని ఆ మహిళ ప్రశ్నించగా.. ‘మీరు మనీలాండరింగ్‌ కేసులో ఇరుక్కున్నారని, అరెస్టు వారెంట్‌ జారీ అయిందని’ అతను పేర్కొన్నాడు. దీంతో భయాందోళనలకు గురైన ఆమె.. తనని ఈ కేసు నుంచి బయటపడేయమని వేడుకుంది. ఇంకేముంది.. తాను వేసిన ప్లాన్ వర్కౌట్ అయ్యిందని భావించి, ఆమె నుంచి డబ్బులు కాజేయాలని ఆ కేటుగాడు నిర్ణయించుకున్నాడు. తొలుత ఆమెకు వీడియో కాల్ చేసి పలు రకాలుగా బెదిరింపులకు పాల్పడ్డాడు. బాత్రూంకి కూడా వెళ్లనివ్వకుండా.. వీడియో కాల్‌లోనే ఉంచాడు. ఈ కేసు నుంచి కాపాడాలంటే, తన ఖాతాలో రూ.60 లక్షలు వేయాలని చెప్పాడు.

Hyderabad: రాత్రివేళ.. రోడ్డుపైనే..

ఆ దుండగుడు చెప్పినట్టుగానే.. మరుసటి రోజు ఉదయం బ్యాంకులు తెరిచాక అతని ఖాతాలో రూ.60 లక్షలు జమ చేసింది. ఈ తతంగం అయ్యేదాకా అతడు వీడియోకాల్ కొనసాగించాడు. తీరా తన ఖాతాలో డబ్బులు పడ్డాక మాయమయ్యాడు. కాసేపయ్యాక తాను మోసపోయానని గ్రహించిన ఆ మహిళ.. వెంటనే పోలీసులకు ఫిర్యాదు చేసింది. ఆమె ఫిర్యాదుతో అప్రమత్తమైన సీఎస్‌బీ బృందం.. ఆ డబ్బులు దుండగుడి ఖాతాలోకి బదిలీ అవ్వకుండా నిలిపివేశారు. గంటలోనే ఈ ప్రక్రియ ముగిసేలా.. చకచకా పనులు చేసేశారు. తన డబ్బులు తిరిగిరావడంతో.. బాధితురాలు ఊపిరి పీల్చుకుంది. ఈ ఘటనపై కేసు నమోదు చేసిన పోలీసులు.. ఆ కేటుగాడి ఆచూకీ కోసం ప్రయత్నిస్తున్నారు.

Read Latest Crime News and Telugu News