BJP state chief: చర్చిలో బీజేపీ రాష్ట్ర చీఫ్ ప్రవేశాన్ని అడ్డుకున్న యువకులు

పెరంబూర్‌(చెన్నై): బీజేపీ రాష్ట్ర అధ్యక్షుడు అన్నామలైను చర్చీలోకి వెళ్లనివ్వకుండా యువకులు అడ్డుకున్నారు. ‘ఎన్‌ మన్‌...ఎన్‌ మక్కల్‌’ పేరుతో అన్నామలై చేపట్టిన పాదయాత్ర ధర్మపురి జిల్లాలో సాగుతోంది. అందులో భాగంగా సోమవారం పాపిరెడ్డిపట్టికి చేరుకున్న అన్నామలై(Annamalai), ఆ ప్రాంతంలోని లూర్దుమలై అన్నై మేరీ చర్చీలోకి వెళ్తుండగా ప్రవేశద్వారం వద్ద యువకులు అడ్డుకున్నారు. మణిపూర్‌లో క్రైస్తవులపై దాడులకు బీజేపీయే కారణమని, ఆ పార్టీకి చెందిన వారు మేరీ మాతకు పూలమాల వేసేందుకు అనుమతించమని యువకులు చెప్పారు. అన్నామలై సర్ది చెప్పబోయినా వారు వినలేదు. భద్రతా విధులో ఉన్న పోలీసులు ఆ యువకులను అక్కడి నుంచి పంపించి వేయడంతో, అన్నామలై చర్చీలోకి వెళ్లి మేరీమాత విగ్రహానికి పూలమాల వేసి తిరిగి వెళ్లిపోయారు.