Jharkhand: జార్ఖండ్ మాజీ సీఎం చంపాయ్ సోరెన్ బీజేపీలో చేరేందుకు తేదీ ఖరారు

జార్ఖండ్‍‌(Jharkhand)లో మరికొన్ని నెలల్లో అసెంబ్లీ ఎన్నికలు జరగనున్న క్రమంలో కీలక పరిణామాలు చోటుచేసుకుంటున్నాయి. ఈ క్రమంలోనే జార్ఖండ్ మాజీ సీఎం చంపాయ్ సోరెన్ ఆగస్టు 30న రాంచీలో అధికారికంగా భారతీయ జనతా పార్టీలో చేరనున్నారు. అస్సాం సీఎం హిమంత బిస్వా శర్మ తన అధికారిక X ఖాతాలో ఓ పోస్ట్ చేసి ఈ సమాచారాన్ని పంచుకున్నారు. చంపై సోరెన్ హోంమంత్రి అమిత్ షాతో సమావేశమయ్యారని ఆయన తన పోస్ట్‌లో తెలిపారు. చంపై సోరెన్ సోమవారం న్యూఢిల్లీకి చేరుకుని బీజేపీ సీనియర్ నేతలతో భేటీ అయ్యారు. గత మంగళవారం నుంచి ఆయన ఢిల్లీకి వెళ్లడం ఇది రెండోసారి.

గతంలో ఇలా

అంతకుముందు ఢిల్లీకి చేరుకున్న చంపై సోషల్ మీడియాలో పోస్ట్ ద్వారా పార్టీ నాయకత్వం తనను అవమానించిందని ఆరోపించారు. నిరంతర అవమానకర ప్రవర్తన కారణంగా ఉద్వేగానికి లోనై రాజకీయాల్లో కొత్త ఎంపికను అనుసరించాలని నిర్ణయించుకున్నానని తెలిపారు. తన బాధను పంచుకుంటూ, నిరంతర అవమానాలు, ధిక్కారాల తరువాత, రాజకీయాల నుంచి విరమించుకోవడం, తన సొంత సంస్థను స్థాపించడం లేదా కొత్త భాగస్వామితో ప్రయాణించడం వంటి ఎంపిక గురించి చంపై ప్రస్తావించారు. అవమానం, తిరస్కరణ కారణంగా, తాను ప్రత్యామ్నాయ మార్గం కోసం వెతకవలసి వచ్చిందన్నారు. ఈరోజు నుంచి తన జీవితంలో కొత్త అధ్యాయం ప్రారంభం కానుందని వెల్లడించారు.

ఊహాగానాలు

ఈ రెండు పర్యటనలలో మాజీ సీఎం అసెంబ్లీ ఎన్నికలకు ముందు జార్ఖండ్‌లోని కోల్హాన్ ప్రాంతంలో తన మద్దతుదారులతో సమావేశమయ్యారు. వ్యూహంపై పార్టీ కార్యకర్తలతోనూ చర్చించారు. ఆ తర్వాత జర్నలిస్టులతో మాట్లాడిన చంపై సోరెన్ కొత్త పార్టీ స్థాపిస్తానని చెప్పారు. ఆయన జార్ఖండ్ ముక్తి మోర్చా (జేఎంఎం) లేదా హేమంత్ సోరెన్ నేతృత్వంలోని ప్రభుత్వంలో తన పదవికి ఇంకా రాజీనామా చేయలేదు. 68 ఏళ్ల చంపాయ్ సోరెన్ JMMపై కోపంతో, తన కార్యకర్తలతో పాటు, పార్టీ వెలుపల అవకాశాల కోసం చూస్తున్నారని కూడా కొన్ని ఊహాగానాలు వచ్చాయి. కానీ ఇప్పుడు వీటన్నింటికి తెర పడింది.

జేఎంఎంకు పెద్ద దెబ్బ

మనీలాండరింగ్ కేసులో హేమంత్ సోరెన్‌ను అరెస్టు చేసిన తర్వాత, చంపై సోరెన్‌ను జార్ఖండ్ సీఎంగా చేశారు. ఫిబ్రవరి నుంచి జులై వరకు సీఎంగా పనిచేశారు. 2005 నుంచి జరిగిన ప్రతి ఎన్నికల్లోనూ ఆయన అసెంబ్లీకి ఎన్నికయ్యారు. హేమంత్ జైలు నుంచి బయటకు వచ్చిన తర్వాత అకస్మాత్తుగా సీఎం పదవికి బలవంతంగా రాజీనామా చేయించిన తీరు తనను బాధించిందని పలువురు అంటున్నారు.

బీజేపీకి లాభం

ఇటివల లోక్‌సభ ఎన్నికల్లో మొత్తం ఐదు రిజర్వ్‌డ్‌ స్థానాల్లో జేఎంఎం చేతిలో బీజేపీ ఓడిపోయింది. కేంద్ర మాజీ మంత్రి అర్జున్ ముండా కూడా తన సీటును కాపాడుకోలేక పోవడంతో గిరిజన సంఘంలో అసంతృప్తి నెలకొంది. కానీ చంపాయ్.. సోరెన్ కుటుంబానికి సన్నిహితుడు, గిరిజన సంఘంలో అనుభవజ్ఞుడైన నాయకుడు అయినందున వచ్చే నవంబర్-డిసెంబర్‌లో జరిగే అసెంబ్లీ ఎన్నికల్లో JMMకి బీజేపీ గట్టి పోటీ ఇవ్వనుంది.

ఇవి కూడా చదవండి:

Delhi : జమ్మూలో బీజేపీ అభ్యర్థులపై రగడ

ఖర్గే కుటుంబ సభ్యులు ఏరో స్పేస్‌ పారిశ్రామికవేత్తలా?

Read More National News and Latest Telugu News