పోలీస్‌స్టేషన్‌లో మందు పార్టీ... ఎస్‌ఐ సహా ముగ్గురు పోలీసుల అరెస్టు
ABN , Publish Date - Sep 17 , 2024 | 03:18 AM
మద్యనిషేధం అమల్లో ఉన్న బిహార్‌లో పోలీసులు ఏకంగా పోలీ్‌సస్టేషన్‌లోనే మందు పార్టీ చేసుకున్నారు.
మద్యనిషేధం అమల్లో ఉన్న బిహార్‌లో ఘటన
సాసారామ్‌, సెప్టెంబరు 16 : మద్యనిషేధం అమల్లో ఉన్న బిహార్‌లో పోలీసులు ఏకంగా పోలీ్‌సస్టేషన్‌లోనే మందు పార్టీ చేసుకున్నారు. కైమూర్‌ జిల్లా సొన్‌హాన్‌ పోలీస్‌ స్టేషన్‌లో సబ్‌ ఇన్‌స్పెక్టర్‌ రాజీవ్‌ రంజన్‌ మరో ఇద్దరు చౌకీదార్లు, ఓ స్థానికుడితో కలిసి మందు పార్టీ చేసుకుంటుండగా ఉన్నతాధికారులకు సమాచారం అందింది. పోలీ్‌సస్టేషన్‌కు చేరుకున్న దర్యాప్తు బృందానికి పీకలదాకా మద్యం తాగిన స్థితిలో పోలీసులు కనిపించారు. వెంటనే వారిని అరెస్ట్‌ చేసి జిల్లా ఎస్పీ లలిత్‌ మోహన్‌ శర్మకు సమాచారమిచ్చారు. ఆ వెంటనే ఆయన మద్యం తాగుతూ దొరికిపోయిన పోలీసులను సస్పెండ్‌ చేశారు. బిహార్‌లో 2016 ఏప్రిల్‌ నుంచి మద్య నిషేధం అమల్లో ఉంది.
