Watch Video: దొంగను అడ్డంగా బుక్ చేసిన పిల్లి.. షాకింగ్ సీన్..!
ABN , Publish Date - Aug 28 , 2024 | 10:11 PM
ఆ దొంగ దోపిడీ కోసం పక్కా ప్లాన్ వేశాడు. ఏకంగా ఆరు అంతస్తుల అపార్ట్‌మెంట్‌ను అలవోకగా ఎక్కేశాడు. నేరుగా ఫ్లాట్‌లోకి దూరి.. చోరీకి పాల్పడ్డాడు. అయితే, ఇంతలోనే పెంపుడు పెద్ద ట్విస్ట్ ఇచ్చింది. దొంగను చూసిన పిల్లు పెద్ద ఎత్తున అరవడంతో ఇంటి యజమాని నిద్ర లేచారు.
ముంబై, ఆగష్టు 28: ఆ దొంగ దోపిడీ కోసం పక్కా ప్లాన్ వేశాడు. ఏకంగా ఆరు అంతస్తుల అపార్ట్‌మెంట్‌ను అలవోకగా ఎక్కేశాడు. నేరుగా ఫ్లాట్‌లోకి దూరి.. చోరీకి పాల్పడ్డాడు. అయితే, ఇంతలోనే పెంపుడు పెద్ద ట్విస్ట్ ఇచ్చింది. దొంగను చూసిన పిల్లు పెద్ద ఎత్తున అరవడంతో ఇంటి యజమాని నిద్ర లేచారు. దొంగను చూసి పట్టుకోబోగా.. తృటిలో తప్పించుకున్నాడు. ఈ ఘటనకు సంబంధించిన వీడియో ఇప్పుడు సోషల్ మీడియాలో వైరల్ అవుతోంది. ఇంతకీ ఈ చోరీ ఎక్కడ జరిగింది. అసలేం జరిగిందో ఈ కథనంలో తెలుసుకుందాం.
ముంబైలోని అంధేరి(వెస్ట్) లోఖండ్‌వాలా కాంప్లెక్స్ 6వ అంతస్తులో సినిమా దర్శకురాలు స్వప్న జోషి కుటుంబ సభ్యులతో కలిసి నివాసముంటున్నారు. అయితే, ఇటీవల ఆ ఫ్లాట్‌లోకి ఓ దొంగ ప్రవేశించాడు. అర్థరాత్రి వేళ అపార్ట్‌మెంట్‌ పైప్ పాకుతూ పైకి వచ్చాడు. ఇల్లంతా కలియతిరిగాడు. ఓ పర్స్ కనిపించగా.. అందులో ఉన్న రూ. 6 వేలు తీసుకున్నాడు. ఇంతలో దొంగను వారి పెంపుడు పిల్లి చూసింది. పెద్ద పెద్దగా అరిచింది. దీంతో వెంటనే ఇంట్లోని వారు నిద్ర లేచారు. దొంగను చూసిన వారు.. అతన్ని పట్టుకోవడానికి ప్రయత్నించారు. కానీ, దొంగ తృటిలో తప్పించుకుపోయాడు.
వెంటనే సీసీ ఫుటేజీని పరిశీలించగా.. అర్థరాత్రి 3.00, 3.30 గంటల సమయంలో దొంగ ఫ్లాట్‌లోకి ప్రవేశించినట్లు గుర్తించారు. ఘటనపై పోలీసులకు ఫిర్యాదు చేయగా.. పోలీసులు కేసు నమోదు చేసుకుని దర్యాప్తు చేస్తున్నారు. కాగా, ఈ విషయాన్ని అశోక్ పండిట్ సోషల్ మీడియా వేదికగా వెల్లడించారు. ఈ చోరీకి సంబంధించిన వీడియోను షేర్ చేశారు.
‘ఈ వీడియో మనందరి కోసం. ముఖ్యంగా ఒంటరిగా నివసించే సీనియర్ సిటిజన్ల కోసం. ఇటీవల ప్రముఖ సినీ దర్శకురాలు స్వప్న జోషి ఇంట్లో దొంగలు చొరబడ్డారు. అతను 6వ అంతస్తు పైకి పైపు సహాయంలో ఎలా ఎక్కాడో చూస్తే షాక్ అవుతారు. సెక్యూరిటీ వైఫల్యం వల్లే ఇది జరిగింది. పిల్లి శబ్ధం చేయడం కారణంగా దొంగ తప్పించుకున్నాడు. అందరూ జాగ్రత్తగా ఉండాల్సిన అవసరం ఉంది.’ అని చెప్పుకొచ్చారు.
