Priyanka Gandhi: రాయ్‌బరేలీ, అమేఠీల్లో ప్రియాంక మకాం..

న్యూఢిల్లీ, మే 5: కాంగ్రెస్‌ కంచుకోటగా పేరున్న రాయ్‌బరేలీ, అమేఠీల్లో ఎన్నికల ప్రచారానికి ఆ పార్టీ నాయకురాలు ప్రియాంక నేతృత్వం వహించనున్నారు. సోమవారం నుంచి ఈ నెల 20న పోలింగ్‌ ముగిసేవరకూ ఈ నియోజకవర్గాల్లోనే మకాం వేయనున్నారు. రెండు దశాబ్దాలుగా సోనియా ప్రాతినిధ్యం వహిస్తున్న రాయ్‌బరేలీ నుంచి ఈ సారి రాహుల్‌ బరిలోకి దిగుతుండగా, కిశోరి లాల్‌ శర్మ అమేఠీ నుంచి పోటీచేస్తున్నారు. రాహుల్‌ దేశవ్యాప్త ప్రచారంలో బిజీగా ఉండడంతో.. ఎంతో కీలకమైన రాయ్‌బరేలీ, అమేఠీల్లో ప్రచార బాధ్యతను ప్రియాంక తీసుకున్నారు.

ప్రియాంకా గాంధీ రెండు నియోజకవర్గాల్లో దాదాపు 200-300 గ్రామాల్లో ఆమె పర్యటిస్తారని, వందలాది రోడ్‌ షోలు నిర్వహిస్తారని, ఇంటింటికీ ప్రచారం వంటి కార్యక్రమాల్లో పాల్గొంటారని పార్టీ వర్గాలు తెలిపాయి. ఇప్పటికే స్వాతంత్య్ర సమరయోధులు, గాంధీ కుటుంబంతో దశాబ్దాల బంధం ఉన్న వారితో సంప్రదింపులు మొదలుపెట్టారు. డిజిటల్‌, సోషల్‌ మీడియా ప్రచారాన్ని పర్యవేక్షిస్తున్నారు. ఖర్గే, రాజస్థాన్‌ సచిన్‌ పైలట్‌ వంటి అగ్రనేతల ప్రచార షెడ్యూల్‌ను కూడా ప్రియాంక చూసుకోనున్నారు.