Tummla : నేడు గాంధీభవన్‌కు మంత్రి తుమ్మల
ABN , Publish Date - Oct 07 , 2024 | 03:47 AM
గాంధీభవన్‌లో సోమవారం జరగనున్న ‘మంత్రితో ముఖాముఖి’ కార్యక్రమంలో వ్యవసాయశాఖ మంత్రి తుమ్మల నాగేశ్వర్‌రావు.. పార్టీ నేతలు, కార్యకర్తలు, ప్రజల నుంచి వినతులు, ఫిర్యాదులు స్వీకరించనున్నారు.
‘ముఖాముఖి’లో వినతులు స్వీకరించనున్న మంత్రి
టీపీసీసీ చీఫ్‌ మహేశ్‌కు ‘అలయ్‌ బలయ్‌’ ఆహ్వానం
హైదరాబాద్‌, అక్టోబరు 6 (ఆంధ్రజ్యోతి): గాంధీభవన్‌లో సోమవారం జరగనున్న ‘మంత్రితో ముఖాముఖి’ కార్యక్రమంలో వ్యవసాయశాఖ మంత్రి తుమ్మల నాగేశ్వర్‌రావు.. పార్టీ నేతలు, కార్యకర్తలు, ప్రజల నుంచి వినతులు, ఫిర్యాదులు స్వీకరించనున్నారు. ఉదయం 11 గంటలకు ఈ కార్యక్రమం ప్రారంభం కానుంది. ప్రతి వారంలో బుధ, శుక్రవారాలు ఈ కార్యక్రమం నిర్వహించాలని టీపీసీసీ ప్రణాళిక సిద్ధం చేసింది. అయితే టీపీసీసీ చీఫ్‌ మహేశ్‌కుమార్‌గౌడ్‌ జిల్లా పర్యటనల నేపథ్యంలో గత బుధ, శుక్రవారాల్లో ఈ కార్యక్రమం జరగలేదు. దీంతో శుక్రవారం జరగాల్సిన కార్యక్రమాన్ని టీపీసీసీ సోమవారం నిర్వహిస్తోంది.
ఈ నేపథ్యంలోనే.. మంత్రితో ముఖాముఖిలో పాల్గొని సమస్యలు పరిష్కరించుకోవాలని పార్టీ నేతలు, ప్రజలకు మహేశ్‌గౌడ్‌ పిలుపునిచ్చారు. విజయ దశమి సందర్భంగా ఈ నెల 13న నాంపల్లి ఎగ్జిబిషన్‌ గ్రౌండ్స్‌లో నిర్వహిస్తున్న అలయ్‌ బలయ్‌ కార్యక్రమానికి రావాలంటూ టీపీసీసీ చీఫ్‌ మహేశ్‌గౌడ్‌ను హరియాణా గవర్నర్‌ బండారు దత్తాత్రేయ ఆహ్వానించారు. ఈ మేరకు ఆదివారం మహేశ్‌ గౌడ్‌ను ఆయన నివాసంలో కలిసి దత్తాత్రేయ కుమార్తె విజయలక్ష్మి ఆహ్వాన పత్రం అందించారు.
