AIG : ఏఐజీలో రూ.400 కోట్లతో ప్రోటాన్‌ బీమ్‌ థెరపీ
ABN , Publish Date - Jan 12 , 2025 | 05:50 AM
క్యాన్సర్‌ రోగులకు ప్రోటాన్‌ బీమ్‌ థెరపీ’ ద్వారా అత్యాధునిక చికిత్స అందించేందుకు హైదరాబాద్‌లోని ఏఐజీ ఆస్పత్రి సిద్ధమవుతోంది.
క్యాన్సర్‌ రోగులకు అత్యాధునిక చికిత్స
త్వరలో అందుబాటులోకి
కణితిని కచ్చితంగా గుర్తించి దానికే చికిత్స
రోగి త్వరగా కోలుకునేందుకు అవకాశం
ఆస్పత్రుల చైర్మన్‌ డాక్టర్‌ నాగేశ్వర్‌రెడ్డి
హైదరాబాద్‌ సిటీ, జనవరి 11 (ఆంధ్రజ్యోతి): క్యాన్సర్‌ రోగులకు ప్రోటాన్‌ బీమ్‌ థెరపీ’ ద్వారా అత్యాధునిక చికిత్స అందించేందుకు హైదరాబాద్‌లోని ఏఐజీ ఆస్పత్రి సిద్ధమవుతోంది. ఇందు కోసం రూ.400 కోట్ల వ్యయంతో డైనమిక్‌ ఏఆర్‌సీ సహా అత్యాధునిక ప్రోటోస్‌ వన్‌-ప్రోటాన్‌ థెరపీ సిస్టమ్‌ను దిగుమతి చేసుకునేందుకు బెల్జియంకు చెందిన ఐబీఏ అనే సంస్థతో ఒప్పందం చేసుకుంది. రూ.800 కోట్ల వ్యయంతో 300 పడకల సామర్థ్యంతో ఆస్పత్రిలో కొత్తగా ఏర్పాటు చేస్తున్న అంకాలజీ విభాగంలో ఈ ప్రోటాన్‌ బీమ్‌ థెరపీని అందుబాటులోకి తెస్తామని ఏఐజీ ఆస్పత్రుల చైర్మన్‌ డాక్టర్‌ నాగేశ్వర్‌ రెడ్డి ప్రకటించారు.
ప్రోటాన్‌ బీమ్‌ థెరపీ అందుబాటులోకి వస్తే ఈ విధానంలో చికిత్స అందించే తెలుగు రాష్ట్రాల్లో తొలి ఆస్పత్రిగా, దేశంలోనే మూడో ఆస్పత్రిగా ఏఐజీ నిలుస్తుందని పేర్కొన్నారు. కాగా, ప్రోటాన్‌ థెరపీ విధానంలో క్యాన్సర్‌ కణితిని కచ్చితంగా గుర్తించి దానికి మాత్రమే చికిత్స చేయడం సాధ్యమవుతుందని డాక్టర్‌ నాగేశ్వర్‌ రెడ్డి తెలిపారు. ఈ విధానంలో కణితి చుట్టుపక్కల ఆరోగ్యంగా ఉన్న ఇతర అవయవాలకు ఎటువంటి నష్టం జరగదని, ఫలితంగా రోగి చాలా త్వరగా కోలుకుంటారని ఆయన వివరించారు. క్యాన్సర్‌ బారిన పడిన చిన్నారులు, వృద్ధులకు ఈ చికిత్స విధానం ఉపయోగకరంగా ఉంటుందని వెల్లడించారు.
