Chandrababu: ప్రధాని మోదీకి చంద్రబాబు లేఖ

అమరావతి: ప్రధాన మంత్రి నరేంద్ర మోదీకి (Prime Minister Narendra Modi) ఏపీ మాజీ సీఎం చంద్రబాబునాయుడు (Chandrababu Naidu) లేఖ రాశారు. ఎన్టీఆర్ (NTR) బొమ్మతో ప్రత్యేక నాణెం విడుదలపై ధన్యవాదాలు తెలుపుతూ చంద్రబాబు లేఖ రాశారు. NTR శతజయంతి సందర్భంగా ప్రత్యేక నాణెం హర్షించదగిన విషయమన్నారు. ఎన్టీఆర్‌ ప్రత్యేక నాణెంపై కేంద్రం నిర్ణయాన్ని టీడీపీ పొలిట్‌బ్యూరో స్వాగతించిందని, ఎన్టీఆర్ తెలుగు వారి ఆత్మగౌరవానికి ప్రతీక అని చంద్రబాబు అన్నారు. NTRను గౌరవించడమంటే తెలుగు వారిని గౌరవించడమేనన్నారు. ఎన్టీఆర్ బొమ్మతో నాణేం విడుదల చేసేందుకు 2023 మార్చి 20న గెజిట్ నోటిఫికేషన్‌ను కేంద్రం విడుదల చేసింది. ఎన్టీఆర్ 100వ జయంతి సందర్భంగా ఎన్టీఆర్ బొమ్మతో రూ. 100 నాణేం విడుదల చేయనున్నారు.

తెలుగుదేశం పార్టీ వ్యవస్థాపకుడు, ఉమ్మడి ఆంధ్ర ప్రదేశ్‌ మాజీ సీఎం ఎన్టీఆర్‌ పేరిట వంద రూపాయల వెండి నాణేన్ని ముద్రించాలని కేంద్ర ప్రభుత్వం నిర్ణయించింది. ముద్రణకు శ్రీకారం కూడా చుట్టింది. ఎన్టీఆర్‌ కుమార్తె, బీజేపీ నాయకురాలు పురందేశ్వరితో మింట్‌ అధికారులు హైదరాబాద్‌లో సమావేశమై ఆమె సూచనలు, సలహాలు తీసుకుని డిజైన్‌ను ఖరారు చేసినట్లు తెలిసింది. త్వరలోనే ఈ నాణేన్ని విడుదల చేసే అవకాశముందని అధికార వర్గాలు తెలిపాయి. ఎన్టీఆర్‌ పేరిట నాణెం జారీ చేయాలని పురందేశ్వరి గతంలో కేంద్ర ఆర్థిక మంత్రి నిర్మలా సీతారామన్‌కు విజ్ఞప్తి చేశారు.