జగన్ లాగా పవన్ వద్ద డబ్బులు లేవు..

న్యూఢిల్లీ: జనసేన అధినేత (Janasena Chief) పవన్ కళ్యాణ్‌ (Pawan Kalyan)పై సీఎం జగన్ (CM Jagan) నోటికి వచ్చినట్టు మాట్లాడారని, పవన్‌కు ఇల్లు లేదని అన్నారని.. ఆయన మొన్ననే ఇల్లు నిర్మించారని ఎంపీ రఘురామ కృష్ణంరాజు (MP Raghurama Krishnamraju) తెలిపారు. ఈ సందర్బంగా గురువారం ఆయన ఢిల్లీలో మీడియాతో మాట్లాడుతూ జగన్ లాగా పవన్ వద్ద డబ్బులు లేవని, నటించి సంపాదిస్తున్నారని అన్నారు. పవన్ తన కులాన్ని, కాపులను, తన వారని చెప్పుకోవడం లేదని జగన్ విమర్శిస్తున్నారని.. మరి జగన్ ఒక్కసారైనా రెడ్డి అని చెప్పుకున్నారా? అని ప్రశ్నించారు. జగన్‌కు కొన్ని కులాలు అంటే ద్వేషమని కమ్మ, ఓబీసీ వర్గం అంటే ఆయనకు ఇష్టం ఉండదన్నారు.

పవన కళ్యాణ్ భార్యలపై సీఎం జగన్ మాట్లాడటం సరికాదని రఘురామ అన్నారు. విజయలక్ష్మి విశాఖలో ఎందుకు పోటీ చేసిందని పవన్ అడిగితే ఏం సమాధానం చెబుతారన్నారు. అలాగే విజయలక్ష్మి పాలేరు, షర్మిల మిర్యాలగూడలో పోటీ చేయొచ్చా అని అడిగితే?.. మీరు ఎక్కడి నుంచైనా పోటీ చేయవచ్చా.. పవన్ కళ్యాణ్ మాత్రం పక్క రాష్ట్రానికి చెందినవారవుతారా? అని ప్రశ్నించారు. జగన్ దొడ్డి దారిన విశాఖ వెళ్తున్నారని, పెద్ద పెద్ద భవనాలు నిర్మించారని అన్నారు. మూడు జిల్లాలు అభివృద్ధి చేయాలని ముఖ్యమంత్రి విశాఖకు వెళ్తారా? అని రఘురామ ప్రశ్నించారు.