Ramakrishna: జోగి రమేష్ అనుచరుల మట్టి దోపిడీపై కలెక్టర్‌కు ఫిర్యాదు

కృష్ణాజిల్లా: మంత్రి జోగి రమేష్ (Minister Jogi Ramesh) అనుచరులు చేస్తున్న మట్టి దోపిడీపై కలెక్టర్‌కు సీపీఐ రామకృష్ణ (CPI Ramakrishna) ఫిర్యాదు చేశారు. మచిలీపట్నం స్పందన కార్యక్రమంలో కంప్లెంట్ చేశారు. మట్టి తవ్వకాలతో యధేచ్ఛగా దోపిడీ చేస్తున్నారని రామకృష్ణ ఆధారాలు అందజేశారు. ఆనంతరం ఆయన మీడియాతో మాట్లాడారు. గూడూరు మండలం ముక్కొల్లు గ్రామంలో మంత్రి జోగి రమేష్ అనుచరులు మట్టి మాఫియా సాగిస్తున్నారని ఆరోపించారు. అధికారులకు ఫిర్యాదు చేసినా స్పందన లేదని చెప్పారు. కలెక్టరేట్‌లో నిర్వహించిన స్పందన కార్యక్రమంలో ఫిర్యాదు చేశామని వెల్లడించారు. కలెక్టర్ రాజబాబుకు అన్ని‌ విషయాలు వివరించినట్లు పేర్కొన్నారు. పంచాయతీ చెరువు గట్లు బలపరుస్తామని తీర్మానం చేసి.. గ్రామంలోని మట్టి మొత్తాన్ని మంత్రి అనుచరులు కొల్లగొడుతున్నారని తెలిపారు. కలెక్టర్ విచారణ చేసి న్యాయం చేయాలని కోరుతున్నామన్నారు. అంతేకాకుండా మట్టి దోపిడీపై గ్రీన్ ట్రిబ్యునల్‌ను ఆశ్రయించేందుకు కూడా సిద్ధంగా ఉన్నట్లు ఆయన వెల్లడించారు.