YCP: ఎమ్మెల్యే కోటంరెడ్డి శ్రీధర్‌ రెడ్డికి సీఎంవో నుంచి పిలుపు... సర్వత్రా ఆసక్తి

అమరావతి: నెల్లూరు రూరల్ ఎమ్మెల్యే కోటంరెడ్డి శ్రీధర్ రెడ్డి (MLA Kotamreddy Sridhar Reddy)కి సీఎం కార్యాలయం నుంచి‌ పిలుపు వచ్చింది. ఈ రోజు సాయంత్రం 5గంటలకు ముఖ్యమంత్రి జగన్ మోహన్ రెడ్డి (AP CM Jaganmohan Reddy)తో ఎమ్మెల్యే సమావేశంకానున్నారు. ఇటీవల ప్రభుత్వ, అధికారుల తీరుపై కోటంరెడ్డి బహిరంగంగా తీవ్ర అసహనం, ఆగ్రహం వ్యక్తం చేసిన విషయం తెలిసిందే. జిల్లా సమీక్ష సమావేశంలో సీఎం మాటకే విలువలేదని ఆయన అన్నారు. సీఎం ఆదేశించినా దర్గా అభివృద్ధి నిధులు ఇవ్వలేదంటూ ఐఏఎస్ అధికారి రావత్‌పై ఆగ్రహం వ్యక్తం చేశారు. ఫించన్లు తొలగించడం సరికాదని, వీలైతే పెంచాలని కోటంరెడ్డి వ్యాఖ్యలు చేశారు. నిబంధనలు సడలించాలని‌ సూచించారు. ఈ క్రమంలో కోటంరెడ్డితో సీఎం భేటీపై వైసీపీ పార్టీ వర్గాల్లో చర్చ నెలకొంది. ఈ భేటీకి రీజనల్ కోఆర్డినేటర్ బాలినేనిని కూడా రావాల్సిందిగా అధినేత ఆదేశించారు. దీంతో ఈ భేటీపై సర్వత్రా ఆసక్తి నెలకొంది.