Chandrababu Naidu: ఉమ్మడి కృష్ణాజిల్లా పర్యటనకు బయలుదేరిన చంద్రబాబు.. టీడీపీ శ్రేణుల ఘనస్వాగతం

అమరావతి: ఉమ్మడి కృష్ణా జిల్లా పర్యటనకు టీడీపీ అధినేత చంద్రబాబు నాయుడు (TDP Chief Chandrababu Naidu) బయలుదేరి వెళ్లారు. మూడు రోజుల పాటు కృష్ణాజిల్లాలో టీడీపీ అధినేత పర్యటించనున్నారు. విజయవాడ తూర్పు, పెనమలూరు, పామర్రు నియోజకవర్గాల మీదుగా మచిలీపట్నం వరకు చంద్రబాబు (TDp Chief) రోడ్ షో జరుగనుంది. సాయంత్రం మచిలీపట్నంలో జరిగే రోడ్ షో, బహిరంగ సభలో చంద్రబాబు పాల్గొంటారు. ఇదేం కర్మ మన రాష్ట్రానికి పేరుతో సాయంత్రం మచిలీపట్నంలో భారీ సభ జరుగనుంది. చంద్రబాబు పర్యటనకు తెలుగుదేశం శ్రేణులు భారీగా తరలివస్తున్నారు.

యువత బైక్ ర్యాలీతో చంద్రబాబు కాన్వాయ్‌ను అనుసరిస్తోంది. మండుటెండను కూడా లెక్క చేయకుండా చంద్రబాబు కాన్వాయ్‌ను భారీ వాహన ర్యాలీ‌తో తెలుగుదేశం శ్రేణులు అనుసరిస్తున్నారు. చంద్రబాబు పర్యటనతో విజయవాడ - బందరు రహదారి పసుపుమయమైంది. పెనమలూరు నియోజకవర్గంలో చంద్రబాబుకు నేతలు ఘన స్వాగతం పలికారు. పెనమలూరు నియోజకవర్గంలో పప్పులు మిల్లు సెంటర్, కానూరు, తాడిగడప, పోరంకి పెనమలూరు, వణుకురు సెంటర్లో బాబుకి బ్రహ్మరథం పట్టారు. పెనమలూరు టీడీపీ ఇన్చార్జ్ బోడె ప్రసాద్ దారి పొడవున పలు ప్రాంతాల్లో చంద్రబాబుకు గజమాలవేసి ఘన సన్మానం చేశారు.