TDP: చంద్రబాబుకి విజయసాయి బర్త్‌డే విషెస్.. ఆసక్తికర ట్వీట్‌.. అచ్చెన్నాయుడి స్పందన ఇదే..

అమరావతి: టీడీపీ అధినేత చంద్రబాబు నాయుడు (TDP Chief Chandrababu naidu) పుట్టిన రోజు శుభాకాంక్షలు తెలియజేస్తూ వైసీపీ ఎంపీ విజయసాయిరెడ్డి (YCP MP Vijayasai Reddy) చేసిన ట్వీట్‌పై తెలుగు దేశం పార్టీ రాష్ట్ర అధ్యక్షులు అచ్చెన్నాయుడు (TDP Leader Atchannaidu) స్పందించారు. టీడీపీ అధికారంలోకి రావడం ఖాయమని అందరికీ అర్థమైందంటూ విజయసాయి ట్వీట్‌పై పరోక్షంగా విమర్శలు గుప్పించారు. గతంలో అవమానించిన వారు.. అవహేళన చేసిన వారు.. ఇప్పుడు ఒళ్లు దగ్గర పెట్టుకుని మాట్లాడుతున్నారన్నారు. చంద్రబాబును ఎవరు విమర్శించినా ప్రజలు ఛీ కొడుతున్నారని తెలిపారు. ప్రజల్లో మార్పు చూసి.. గతంలో విమర్శించిన వాళ్లల్లో భయంతో కూడిన మార్పు వచ్చిందని వ్యాఖ్యలు చేశారు.

వైఎస్ వివేకా హత్యపై జరుగుతోన్న చర్చను పక్క దారి పట్టించేందుకే విశాఖలో కాపురం అంటూ జగన్ వ్యాఖ్యలు చేశారని మండిపడ్డారు. ఉత్తరాంధ్రకు తామేం చేశామో శ్వేతపత్రం విడుదల చేస్తామని.. వైసీపీకి ఆ దమ్ము ఉందా అని సవాల్ విసిరారు. ఉత్తరాంధ్ర ప్రాజెక్టులకు చంద్రబాబే ఎక్కువ ఖర్చు చేశారని ఇరిగేషన్ ఈఎన్సీనే చెప్పారన్నారు. భావనపాడు పోర్టుకు ఎప్పుడో గ్రీన్ సిగ్నల్ ఇస్తే.. ఇప్పుడు శంకుస్థాపన చేస్తారా అని మండిపడ్డారు. జగన్ ప్రభుత్వం వెంటిలేటర్ మీద ఉందని.. వెంటిలేటర్ మీదుండి శంకుస్థాపన చేస్తామంటే ఎవరు నమ్ముతారని ప్రశ్నించారు. జగన్ రాజ్యాంగబద్దంగా ఎన్నికైన ముఖ్యమంత్రేనా అని నిలదీశారు. కోర్టుల్లో కేసులుంటే విశాఖ వెళ్లి కాపురం పెడతానంటారా అంటూ అచ్చెన్న తీవ్రస్థాయిలో విరుచుకుపడ్డారు.

విజయసాయిరెడ్డి ట్వీట్ ఇదే...

టీడీపీ చీఫ్‌ చంద్రబాబు నాయుడు‌కు విజయసాయిరెడ్డి ట్విటర్ వేదికగా హృదయపూర్వక జన్మదిన శుభాకాంక్షలు తెలిపారు. ‘‘టీడీపీ అధ్యక్షులు, ప్రతిపక్ష నాయకులు శ్రీ నారా చంద్రబాబు నాయుడు గారికి హృదయపూర్వక జన్మదిన శుభాకాంక్షలు. సంపూర్ణ ఆరోగ్యం, దీర్ఘాయుష్షుతో మరెన్నో ఆనందకరమైన పుట్టినరోజులు జరుపుకోవాలని ఆకాంక్షిస్తున్నా’’ అని విజయసాయిరెడ్డి ట్వీట్ చేశారు. విజయసాయిరెడ్డి ట్వీట్‌పై నెటిజన్లు పెద్ద ఎత్తున స్పందిస్తున్నారు. ‘మీరు మారిపోయారు’ సర్ అంటూ పెద్ద ఎత్తున ట్వీట్స్ వస్తున్నాయి. మీ నుంచి ఇది ఊహించలేదంటూ కొందరు.. మీరు ఇలాగే ఉండండి సార్ అంటూ కొందరు.. ఇది మేము ఊహించలేదు సార్ అంటూ కొందరు.. పెద్ద ఎత్తున నెటిజన్లు కామెంట్స్ చేస్తున్నారు.